《胡文池牧师kap布农族》

 | | | 转寄

毒蛇之患

作者 胡文池 2009.03.29

观音山教会右邻是警察派出所，左邻是医生诊所，顶面有耶和华，所以chit所在m̄免惊chha̍t-á、强盗侵犯，mā m̄免惊病魔伤害，koh-khah m̄免惊鬼怪出现。惟独惊由地面偷袭ê蛇类。

山是蛇族ê乐园，但是m̄知何故，不时有一kóa毒蛇ài离开in ê乐园，偷偷á溜落山来，造访山脚下ê观音山教会。

1939年到1941年，我tī观音山教会牧会。记忆中，常常看tio̍h毒蛇爬行tī宿舍门外，也bat进入厝内三pái。

有一pái，天才tú亮，我开门boeh上厕所，猛然看见一条龟角花蛇卷成圆形甜困tī门前，ah!好佳哉ah!三十年前chit所在iah无电火，如果早一点，天末亮时我就起床boeh上厕所，一脚tā下，án-ne就惨了。

Iáu有一pái，礼拜日早起，我前往礼拜堂，phah开大门时，吓了一跳!竟然看tio̍h一条大蛇，约有五、六尺长，困tī长椅下底，当然对付chiah-ê无受欢迎ê动物，阮是赶尽杀绝ê。第一个原因，因为in是魔鬼ê象徵，in ê老祖先「古蛇」(启示录二十：2)bat引诱咱ê始祖犯罪。第二个原因是古蛇ê子孙iáu-kú原性不改，时常boeh伤害咱人类，chit种仇恨世代相传，永远bē消失。何况圣经上mā明记载讲：「我boeh叫你(蛇)kap女人彼此为仇，你ê了后裔kap女人ê了后裔mā彼此为仇，女人ê了后裔boeh伤害你ê头，你beh伤伊ê脚跟。」(创世记三：15 )

咱不时听讲某家有蛇侵入睡房咬死人，咱却一直受tio̍h上帝保护，免受伤害。夜间，当阮轮流到庄脚会友家做家庭礼拜时，途中mā常遇tio̍h蛇，tān-sī每pái lóng ē-tàng平安无事，真是感谢o-ló恩主ê看顾。