《胡文池牧师kap布农族》

 | | | 转寄

骑驴出诊ê医生-tī观音山教会

作者 胡文池 2009.03.22

陈长老见证讲：「tī台南有一位名医，吴秋微先生。In夫妇是虔诚而且有爱心ê基督徒。我原本m̄信主，但是tī in诊所做药局生ê时chūn，m̄-nā学习了医术，koh-khah宝贵ê是学习了in信仰ê好榜样，chiah成做基督徒。得tio̍h主ê帮助，医师检定考试通过了后，我来到chia偏僻ê山地服务。」 陈长老bat医好了不计其数ê危急病患。伊名叫添寿，果真无负其名，加添了真chē人ê寿命。

Tī台北地区、淡水对岸，有座观音山，tī东部mā有一座同名ê山，却是比较小型ê。位 tī东部铁路大禹khiā东方约十公里处。看起来真近，行起来却真远。

到观音山途中，必经一条秀姑峦溪，伊虽然有女人ê名字，却无女人ê温柔、慈爱，因为水流湍急，若无坐渡船就会hō͘伊带走á丧命。

观音山麓一带tòa有将近百户和顺朴素ê农民kap平地山胞。四十年前既无车祸，mā无歹徒抢杀危险，tī这安静，风光明媚ê所在，称得上是世外桃源乡。

观音山教会左隣有一诊所，是教会长老陈添寿先生开设ê。伊体格如撒该矮小，却无像伊贪财。圆圆ê面上留有德国希特勒型二点式小胡子。希特勒是魔鬼ê化身，bat tī第二次大战中杀死六百万犹太人。但是陈长老tú好相反，伊有慈爱ê心肠。一般ê私人诊所若无缴现金，就免想the̍h-tio̍h药，陈长老却同情患者ê困境，病患大部分无带现金来看病。陈长老lóng是来者不拒，伊仝款以爱心为in诊察、投药、注射。看完病记个帐就ē-tàng了。等到农民收割时，chiah叫药局助手带数十个大麻袋，到每一债务者处，以稻谷iáu帐，收回药价。医生、病家lóng大欢喜。

四十年前，tī大都市mā无计程车，甚至大牌医生mā无轿车。Tī这农村koh-khah m̄免谈了。

但是医生ê时间就是金钱，陈医生无时间慢慢行，到病患家出诊往往koh须花费真chē ê时间。因此，伊开了我一个月薪水ê一百倍钱，买来一台五百西西德国机车，专为出诊之用。但tī崎岖颠簸ê农村小石路上，走了无久就发生故障、动弹bē-tàng。伊虽然是医生，却bōe-sái医治机车ê病，附近mā无机车行thang修理，所以只好khǹg tī行廊当古董。

有一工，陈医生koh一pái读主耶稣骑驴入城ê故事，得tio̍h启示，买来一头驴á当步。这小动物既m̄食汽油，mā不故障，横直tī农村内底驴á ê食料真多。驴有一种怪性，一到三更半暝ê时chūn，会像鸡公叫。不过伊ê叫声kap鸡公无仝款。鸡公是叫三声：「oh-oh-oh。」驴是叫二声：「oh依-oh依-」，叫了数次chiah停。

陈长老用这自然ê交通车，实在特殊，m̄-nā ē-tàng享受像主耶稣骑驴入城ê胜利者形像大出风头，也thang减轻病人负担出诊费用。一举两得，何乐无为。

陈医生全家热心事奉主，为传道人看病mā m̄收任何费用。每礼拜，in必定参加礼拜，有时chūn mā代我讲道，是教会里模范ê长老。