《台语kah魔术》

 | | | 转寄

1225圣诞节~启应文

作者 苏晏德 2023.12.24

路竹教会圣诞节感恩礼拜~启应文
启：十二月份过圣诞，圣诞钟声当咧霆
Khé：Cha̍p-jī goe̍h-hūn kòe Sèng-tàn，Sèng-tàn cheng-siaⁿ tng teh tân
应：耶稣降生拯救咱，赐咱福气佮平安
Èng：Iâ-so͘ tàn-seng chín-kiù lán，Sù lán hok-khì kah pêng-an
启：二十四暗平安暝，等待耶稣来出世
Khé：Jī-cha̍p-sì àm pêng-an-mî，Tán-thāi Iâ-so͘ lâi chhut-sì
应：生伫马槽真卑微，博士揣人靠天星
Èng：Seⁿ tī bé-chô chin pi-bî，Phok-sū chhōe-lâng khò thiⁿ-chhiⁿ
启：二十四暗报佳音，人人祈祷备办心
Khé：Jī-cha̍p-sì àm pò ka-im，Lâng-lâng kî-tó pī-pān sim
应：信徒弹瑟阁弹琴，迎接救主来降临
Èng：Sìn-tô͘ tôaⁿ-sek koh tôaⁿ-khîm，Ngiâ-chih Kiù-chú lâi kàng-lîm
启：12月二五圣诞节，救主耶稣来降世
Khé：12 goe̍h jī-gō͘ Sèng-tàn-cheh，Kiù-chú Iâ-so͘ lâi kàng-sè
应：伯利恒城真美丽，欢喜歌声满四界
Èng：Pek-lī-hêng-siâⁿ chin bí-lē，Hoaⁿ-hí koa-siaⁿ móa-sì-kè
启：旷野周围真恬静，天星闪熠现光明
Khé：Khòng-iá chiu-ûi chin tiām-chēng，Thiⁿ-chhiⁿ siám-sih hiàn kng-bêng
应：独生圣囝伫天顶，为救万民来降生
Èng：To̍k-seⁿ Sèng Kiáⁿ tī thiⁿ-téng，Ūi kiù bān-bîn lâi kàng-seng
启：上帝恩典佮疼痛，救赎万民用苦工
Khé：Siōng-tè un-tián kah thiàⁿ-thàng，Kiù-sio̍k bān-bîn ēng khó͘-kang
应：耶稣降临拯救人，普天同庆对天降
Èng：Iâ-so͘ kàng-lîm chín-kiù lâng，Phó͘-thian tông-khèng tùi thiⁿ kàng
启：独生圣囝主耶稣，为着人类来受苦
Khé：To̍k-seⁿ Sèng Kiáⁿ Chú Iâ-so͘，Ūi-tio̍h jîn-lūi lâi siū-khó͘
应：阮欲大声来欢呼，感谢救主引chhōa路
Èng：Goán beh tōa-siaⁿ lâi hoan-ho͘，Kám-siā Kiù Chú ín-chhōa lō͘
启：耶稣出世马槽内，圣诞歌声报人知
Khé：Iâ-so͘ chhut-sì bé-chô lāi，Sèng-tàn koa-siaⁿ pò lâng chai
应：毋管古今佮未来，耶稣佮咱永同在
Èng：M̄-koán kó͘-kim kah bī-lâi，Iâ-so͘ kah lán éng tông-chāi