《台语kah魔术》

 | | | 转寄

1122~28感恩节~启应文

作者 苏晏德 2023.11.26

＊路竹教会感恩节感恩礼拜~启应文

启：十一月份真特别，第四主日感恩节
Khé：Cha̍p-it goe̍h-hūn chin te̍k-pia̍t，Tē-sì Chú-ji̍t Kám-un-chiat

应：感恩奉献爱迫切，信仰传承爱连结
Èng：Kám-un hōng-hiàn ài pek-chhiat，Sìn-gióng thoân-sêng ài liân-kiat

启：先人信仰真坎坷，信心火种一直揲
Khé：Sian-jîn sìn-gióng chin khám-khiat，Sin-sim hóe-chéng it-ti̍t ia̍t

应：咱的信心毋通灭，感恩祭坛大建设
Èng：Lán ê sìn-sim m̄-thang bia̍t，Kám-un chè-tôaⁿ tōa kiàn-siat

启：感谢救主的大恩，恩典满满用有賰
Khé：Kám-siā Kiù-chú ê tōa-un，Un-tián móa-móa ēng ū chhun

应：为主做工爱殷勤，感恩奉献照本份
Èng：Ūi Chú chò-kang ài un-khûn，Kám-un hōng-hiàn chiàu pún-hūn

齐：主上帝啊，感谢祢的救恩
Chê：Chú Siōng-tè ah，Kám-siā Lí ê kiù-un

启：感恩佳节大欢喜，一年一摆好日子
Khé：Kám-un ka-chiat tōa hoaⁿ-hí，chi̍t-nî chi̍t-pái hó ji̍t-chí

应：圣经教示爱谨记，敬拜上帝添福气
Èng：Sèng-keng kà-sī ài kín-kì，Kèng-pài Siōng-tè thiam hok-khì

启：十一月份感恩节，信徒欢喜来献祭
Khé：Cha̍p-it goe̍h-hūn Kám-un-cheh，Sìn-tô͘ hoaⁿ-hí lâi hiàn-chè

应：满心感谢主上帝，求主保守咱全家
Èng：Móa-sim kám-siā Chú Siōng-tè，Kiû Chú pó-siú lán choân-ke

启：感谢上帝无时停，恩赐平安咱家庭
Khé：Kám-siā Siōng-tè bô-sî-thêng，Un-sù pêng-an lán ka-têng

应：礼拜聚会有热情，拜主热心阁虔诚
Èng：Lé-pài chū-hōe ū jia̍t-chêng，Pài Chú jia̍t-sim koh khiân-sêng

启：祝福歌声传里邻，福气济济用袂尽
Khé：Chiok-hok koa-siaⁿ thoân lí-lîn，Hok-khì chē-chē iōng bē-chīn

应：满心呵咾主真神，满面春风谢主恩
Èng：Móa-sim o-ló Chú chin Sîn，Móa-bīn-chhun-hong siā Chú in