《台语kah魔术》

 | | | 转寄

0308妇女节

作者 苏晏德 2024.03.03

妇女节(台语文) Hū-lú-cheh

三月初八妇女节
Saⁿ-goe̍h chhe-peh Hū-lú-cheh
妇女双手上美丽
Hū-lú siang-chhiú siōng bí-lē
啥物空课伊拢会
Siáⁿ-mih khang-khòe i lóng ē
你是阮的天佮地
Lí sī goán ê thiⁿ kah tē

妇女双手捒摇笱
Hū-lú siang-chhiú sak iô-kô
共咱细囝当作宝
Kā lán sè-kiáⁿ tòng-chò pó
你的恩情像江河
Lí ê un-chêng chhiūⁿ kang-hô
会当予囝通倚靠
Ē-tàng hō͘ kiáⁿ thang óa-khò

细囝生长靠妇女
Sè-kiáⁿ seng-tióng khò hū-lú
妇女功能真特殊
Hū-lú kong-lêng chin te̍k-sû
教囝道理像老师
Kà kiáⁿ tō-lí chhiūⁿ lāu-su
教咱做人佮做事
Kà lán chò-lâng kah chò-sū

男人成功妇女助
Lâm-jîn sêng-kong hū-lú chō͘
妇女角色足辛苦
Hū-lú kak-sek chiok sin-khó͘
教囝踏出第一步
Kà kiáⁿ ta̍h-chhut tē-it pō͘
予咱美好的前途
Hō͘ lán bí-hó ê chiân-tô͘