《台语kah魔术》

 | | | 转寄

台南山线游记

作者 苏晏德 2017.01.29

台南山线游记

2016年1月初2拜六乌阴天，早时9点半出发，今仔日ê目的地是台南市ê南化、左
镇、新化，chit三ê行政区原本拢属tī台南县，县市合并以后属台南市ê行政区，虽
罔chit三ê所在m̄-sī第一摆来，m̄-koh以前对chit-ê所在无特别ê斟酌，chit摆
是因为beh去南化乌山看猴，顺绁来一回深度ê旅游。

第一站：『南化乌山』，一家三人，车chiūⁿ路竹交流道上北，沿国道1号转台86号
转国道3号，转对国道8号终点到新化，转台20、20乙线看着横向ê台3线，mài
uat直行到目的地乌山。Chit-ê所在来过几若摆，几若冬无来、一切拢变ah，游
客、猴仔、生理担拢变少，感觉无以前ê chhia-iāⁿ，山顶ê猴拢走落来kah人做
朋友，chia-ê猴仔看--起来chiâⁿ友善，因为人ē买涂豆kah芎蕉hōo猴仔做等路
（礼物）。大约tī-chia半点钟，车驶落山到南化市区ê菜市仔食tàu，虽罔chia
是南化上闹热ê行政中心，m̄-koh人口无济，市区无几条街仔路，南化是台南市人口上少ê所在。食完中昼、头家娘in读国小六年ê查某囝出来收钱，我叫伊爱讲台语
救台湾，伊随用台语讲：我会会晓讲，我会认真讲台语；我讲以后会阁来kā lín捧
场；叫人讲台语是台语人ê责任，chit-ê查某囡仔hō͘我留落真深ê印象，南化后摆
我会阁来。

第二站：『左镇二寮山』，离开南化沿台20乙线、南168线、来到岗仔林
（kong-á-nâ）长老教会，chit间教会是英国ê马雅各医生来台南医疗传教ê时，
有患者受马雅各医生ê大爱精神感动，在地人对基督教福音ê渴慕，信徒同心合力
tī-chia开设chit间教会，虽罔会友无济，m̄-koh意义重大。Sòa接uat过南162
线来到二寮山，chia是台南人看日出上好ê地点，peh chiūⁿ观景台四周围拢是
山，chia是台南有名ê恶地月世界，虽罔是中昼因为罩雾ê关系，所以视线并无清
楚，khiā tī-chia着kán-ná进入仙境kāng款。翻头beh去新化，看着hōo人放
sak ê岗仔林国小kah岗仔林派出所，bat听过废校、第一摆看着废掉ê派出所，可
能chia-ê人口siūⁿ-sió，警察无代志做，自按呢kā伊废掉。

第三站：『新化老街』，车沿南168线经过大坑休闲农场，（chia是台湾罗马字协
会2015年办年会ê所在地）、到虎头埤转台19甲线，开始落sap-sap-á雨，来到新
化老街，怪奇！哪会无看着戴警察帽仔ê新化警察分局，原来已经拆掉起tī中山路ê
郊外。车tī市区慢慢仔pōng，tī信义路kah护安路口看着大目降故事馆（大目降是
新化ê古早名），chia有几若栋日本式ê建筑，雨笠gia̍h--leh来参观看看leh。
大目降早期有平埔族Siraya族群tī-chia 蹛，意思着是山林ê地。停无久tō徙跤
来到台19甲kah太平街ê交叉路口，tī太子宫ê头前有人teh排队，啥货ah！哪会
chiah-nī济人teh排队，原来是beh买『麦克炸鸡块』，我问在地ê阿婆：he是足
好食hiooh？今仔日哪会排hia长，伊讲：he犹无算长ooh，阿婆讲伊拢m̄-bat买
来食。车uat过忠孝路，kāng款ê情形阁发生一摆，路边犹原足济人teh排队，原来
是beh买葱仔饼。车经过新化高中uat过中山路，驶无偌久tō看着厝顶戴警察帽仔新
化警察分局，阮tī-chia hip一张相片，然kî后车驶chiūⁿ高速公路，踏入回乡ê
路途，雨继续落、车宽宽仔驶、风景liâu-liâu-á欣赏，又阁是美好ê一日，台南
感谢--你。