《台语kah魔术》

 | | | 转寄

路竹教会70周年

作者 苏晏德 2016.10.30

路竹教会70周年感恩礼拜~作者：苏晏德

路竹教会过生日 Loō-tek kàu-hōe kòe seⁿ-ji̍t
敬拜上帝排第一 Kèng-pài Siōng-tè pâi tē-it　
兄弟姊妹爱尽职 Hiaⁿ-tī chí-moāi ài chīn-chit
信仰火种毋通熄 Sìn-gióng hóe-chéng m̄-thang sit

七十周年的种子 Chhit-cha̍p chiu-nî ê chéng-chí
福音路竹传出去 Hok-im Loō-tek thoân--chhut-khì
上帝不变的真理 Siōng-tè put-piàn ê chin-lí
喜乐平安大福气 Hí-lo̍k pêng-an tōa hok-khì

细汉跟缀主跤步 Sè-hàn kun-tòe Chú kha-poō
感谢耶稣的保护 Kám-siā Iâ-soo ê pó-hoō
爱吟圣诗来欢呼 Ài gîm Sèng-si lâi hoan-hoo
至好朋友是耶稣 Chì-hó pêng-iú sī Iâ-soo

大汉以后行天路 Toā-hàn í-āu kiâⁿ thiⁿ-loō
勤读圣经饮甘露 Khîn tha̍k Sèng-keng ím kam-loō
耶稣是咱避难所 Iâ-soo sī lán pī-lān-soó
毋惊拄着大风雨 M̄-kiaⁿ tú-tio̍h tōa hong-hoō

前辈教咱白话字 Chiân-pòe kà lán Pe̍h-ōe-jī
豆菜芽仔真趣味 Tāu-chhài-gê-á chin chhù-bī
予咱会晓吟圣诗 Hoō lán ē-hiáu gîm Sèng-si
欲读圣经真便利 Beh tha̍k Sèng-keng chin piān-lī

宣扬福音七十冬 Soan-iông hok-im chit-cha̍p tang
感谢耶稣的疼痛 Kám-siā Iâ-soo ê thiàⁿ-thàng
上帝恩典毋通藏 Siōng-tè un-tián m̄-thang chhàng
大好消息紧报人 Tōa-hó siau-sit kín pò--lâng

路上耶稣来扶持 Loō-chiūⁿ Iâ-soo lâi hû-chhî
竹林有主的印记 Tek-nâ ū Chú ê ìn-kì
教导信仰传乡里 Kàu-tō sìn-gióng thoân hiuⁿ-lí
会友顺趁主教示 Hōe-iú sūn-thàn Chú kà-sī

生根发叶伫路竹 Seⁿ-kin hoat-hio̍h tī Loō-tek
日日学习主款式 Ji̍t-ji̍t ha̍k-sip Chú khoán-sek
快传福音爱积极 Khoài-thoân hok-im ài chek-ke̍k
乐意服侍阁尽责 Lo̍k-ì ho̍k-sāi koh chīn-chek

七十周年教会史 Chhit-cha̍p chiu-nî kàu-hōe-sú
十分虔诚感谢主 Cha̍p-hun khiân-sêng kám-siā Chú
周年回顾感动久 Chiu-nî hôe-koò kám-tōng kú
年长信仰真可取 Nî-tióng sìn-gióng chin khó-chhú

感谢救主的大恩 Kám-siā Kiù-chú ê tōa-un
恩典满满用有賰 Un-tián móa-móa ēng ū chhun
礼拜热心荫囝孙 Lé-pài jia̍t-sim ìm kiáⁿ-sun
拜主上帝大人君 Pài Chú Siōng-tè toā-jîn-kun

信仰坚定拢共心 Sìn-gióng kian-tēng lóng kāng-sim
仰望真理传福音 Gióng-bōng chin-lí thoân hok-im
传湠后代咱责任 Thn̂g-thòaⁿ āu-tāi lán chek-jīm
湠开信仰日日深 Thoaⁿ-khui sìn-gióng ji̍t-ji̍t chhim

宣扬福音大真光 Soan-iông hok-im tōa-chin-kng
扬弃偶像有担当 Iông-khì ngoó-siōng ū tam-tng
福音真理莫抛荒 Hok-im chin-lí mài pha-hng
音乐布道传家庄 Im-ga̍k poò-tō thoân ka-chng


路竹教会伫1946年10月25设教
伫2016年10月23举行设教70周年感恩礼拜
主题：信仰传湠、宣扬福音