《台语kah魔术》

 | | | 转寄

八月中秋0815

作者 苏晏德 2023.09.24

八月中秋(台语文) 苏晏德

八月中秋看月娘
Peh-goe̍h Tiong-chhiu khòaⁿ goe̍h-niû
月娘圆圆若像球
Goe̍h-niû îⁿ-îⁿ ná chhiūⁿ kiû
全家来食文旦柚
Choân-ke lâi chia̍h bûn-tàn-iū
逐家欢喜过中秋
Ta̍k-ke hoaⁿ-hí kòe Tiong-chhiu

八月中秋人团圆
Peh-goe̍h Tiong-chhiu lâng thoân-îⁿ
月娘圆圆月饼甜
Goe̍h-niû iⁿ-iⁿ goe̍h-piáⁿ tiⁿ
平安喜乐中秋暝
Pêng-an hí-lo̍k Tiong-chhiu mî
逐家耍甲笑微微
Ta̍k-ke sńg kah chhiò-bi-bi

八月中秋放烟火
Peh-goe̍h Tiong-chhiu pàng ian-hóe
囡仔相招覕相揣
Gín-á sio-chio bih-sio-chhōe
大人啉茶讲笑诙
Tōa-lâng lim-tê kóng chhiò-khoe
快乐中秋平安过
Khoài-lo̍k Tiong-chhiu pêng-an kòe

八月中秋问嫦娥
Peh-goe̍h Tiong-chhiu mn̄g Siông-ngoô
天顶敢真有玉兔
Thiⁿ-téng kám chin ū gio̍k-thoò
若有阮会足欣慕
Nā-ū goán ē chin him-boō
月娘叫阮用心悟
Goe̍h-niû kiò goán iōng-sim ngoō