《台语kah魔术》

 | | | 转寄

数念郑正煜老师

作者 苏晏德 2015.05.03

数念郑正煜老师 Siàu-liām Tēⁿ Chèng Io̍k lāu-su

我所敬疼郑正煜 Góa soó kèng-thiàⁿ Tēⁿ Chèng Io̍k
毋惊病魔来凌辱 M̄-kiaⁿ pēⁿ-moô ê lêng-jio̍k
一生拍拚为教育 It-seng phah-piàⁿ ūi kàu-io̍k
向望母语好结局 Ǹg-bāng bó-gí hó kiat-kio̍k

病魔陪你十外冬 Pēⁿ-moô pôe lí cha̍p-gōa-tang
时时刻刻无放松 Sî-sî-khek-khek bô pàng-sang
为咱编写一个梦 Ūi lán pian-siá chi̍t-ê bāng
编写母语新希望 Pian-siá bó-gí sin hi-bāng

12月初10人权日 12 goe̍h chhe 10 jîn-koân-ji̍t
你伫这工来发翅 Lí tī chit-kang lâi hoat-si̍t
恬恬离开放落笔 Tiām-tiām lī-khui pàng-lo̍h pit
你的天路阔阁直 Lí ê thiⁿ-loō khoah koh ti̍t

老师勇敢阁坚强 Lāu-su ióng-kám koh kian-kiông
生死看甲真平常 Seⁿ-sí khòaⁿ kah chin pêng-siông
疼惜土地爱高雄 Thiàⁿ-sioh thoó-tē ài Ko-hiông
堪称台湾的英雄 Kham-chheng Tâi-oân ê eng-hiông

老师认真阁拍拚 Lāu-su jīn-chin koh phah-piàⁿ
是咱学习的明镜 Sī lán ha̍k-si̍p ê bêng-kiàⁿ
为着母语来发声 Ūi-tio̍h bó-gí lâi hoat-siaⁿ
啥物阻挡拢毋惊 Siáⁿ-mi̍h choó-tòng lóng m̄-kiaⁿ

老师讲话真直接 Lāu-su kóng-ōe chin ti̍t-chiap
母语生存受威胁 Bó-gí seng-chûn siū ui-hia̍p
文章批判无掩揜 Bûn-chiuⁿ phoe-phòaⁿ bô ng-iap
堪称台语的义侠 Kham-chheng Tâi-gí ê gī-kiap