《台湾谚语咸酸甜》

 | | | 转寄

三兄弟股一条琼麻索。

作者 萧平治 2006.05.14

琼麻就是龙舌兰，俗称树丝，因为伊树叶ê 纤维，韧koh m̄ 惊水浸，提来股索仔，坚固耐用，是讨海人ê 重要工具，南部出产kài 济。

用琼麻股索á是m̄-bat 看过，用黄麻绞索仔，m̄但bat khoàiⁿ，gín-á时代mā bat kap 大人绞过，不过绞-- ê是两股ê 索仔，绞三股--ê 就无hit款功夫。

过去生活tī 庄脚ê 作穑人，担担（taⁿ-tàⁿ）ê 畚箕、米lôa ài 缚索仔，载货、缚柴ài 用索仔liāu ，牵牛、驾kha 车、驶田、捆猪、拖车…步步lóng-tio̍h用索仔，索仔tī 田庄所在是生活必须品。细条索仔用双手捻，抑是tiàm 脚头 u 搓就会使chit ，大条索若无用家私头仔来股，是无可能ê 代志，过去作田人若有闲工，就三、五个招--leh ，互相tàu 相仝，phah几条á索á khǹg-leh thang 用。

股索仔ài 用绞索仔机，he 是一套用木材做ê 工具，前车是四角型ê 框架，kah 黏tī 椅条顶，有三kâi 孔，穿三支ㄣ字形ê 铰仔，前面会tàng结索仔，后面用一块竹phòe 钻三kâi 孔，拄好lop-tī 三支绞á，thiòng-á 三支同齐股tín 动；后车kan-nā 一支柴柱，半人koân ê 所在凿（chha̍k）一孔，共款穿一支ㄣ字形ê 绞仔；另外有一粒羊仔头形ê tēng 柴，刻三条沟，beh hō͘ 三股ê 黄麻khòa tī 沟内，chiah 会tàng平平顺顺、pêⁿ-pêⁿ 正正股成一条索仔。

股索仔tio̍h-ài 三个人，一个hōaⁿ 前车，顾hit 三支绞仔ê 运转，绞正绞，一个固定后车，用倒手挽hit 支柴柱hō͘ 固定，koh着用正手股绞仔，而且ài 倒绞，另外一个hōaⁿ 羊仔头，hōaⁿ 羊仔头chiah 是师傅，索仔绞会súi lóng着靠伊ê 功夫kap 指挥。

Chit-mái 开始beh 绞索仔--lò͘：前车先绞一支绞仔，师傅提黄麻皮套tiàm 绞仔头，然后一皮一皮纺，纺一条五丈长ê 无股ê 索仔，chiah koh纺一条两丈半--ê，五丈-- ê拗做两koe̍h，套tī 后车，尾节套tī 前车，chit-má 前车三支绞仔缚三条索，后车一支绞仔mā缚三条索，师傅掠羊仔头ùi 前车hit 旁套好势，然后一声开始，前后车股无停，师傅hōaⁿ羊仔头顺索á股一直倒退lu ，后车一直股一直hō͘ 索仔khiú晋前，手挽脚kēng，惊做索仔siuⁿ lēng ，索á若siuⁿ lēng ，绞khit 来ê 索仔一定phàⁿ-phàⁿ，bē 坚固耐用。

后车ná会行晋前neh？因为索仔愈绞愈ân soah愈绞愈短，本来是两丈半，绞好可能chhun 两丈两尺，kiu 三尺算真正常。一条绞好chiah-koh绞一条，beh 大beh 细，由在师傅斟酌soah 黄麻，黄麻若soah济，索á自然大条，黄麻若soah少，索á当然细条，若是绞两股ê 索á就khah简单，可惜bē勇mā khah pháiⁿ看头，he 是师á工学绞，绞chhit-thô --ê。

「三兄弟股一条琼麻索」，若有和协会齐，he 是真简单，团结就是力量，看田庄人绞索á就是上好ê 证明，早当时阮田庄兄弟leh 绞索仔，无一定是亲兄弟，却是合作团结ê 力量是无teh 比，因为庄内ê 厝边隔壁lóng若亲兄弟，过去ê 庄脚人，m̄ 免去强调啥物『敦亲睦邻，守望相助』，庄头ê 安全就顾kah 好势好势，时代leh 变，社会一直变迁，古早味，古早ê 人情味，使人怀念。

「三兄弟绞一条黄麻索」ê 『团结力量』，会tàng hō͘ 有心爱台湾ê 乡亲兄弟做参考，「团结」ê 台湾，chiah 是有向望-- ê。

【注解】： 1.琼麻：khêng-môa。2.纤维：chhiam-ûi。3.韧：jūn。4.股：kó͘。绞。5.索仔：[绳子]。6.kài 济：真济。7.担担：taⁿ-tàⁿ。8.米lôa ：米箩。9.liāu ：[缠绕着绑物]。10.kha 车：驾牛ê 器具。11.步步：ta̍k项。12.捻：lián 。13.脚头 u ：[膝盖]。14.搓：so。15.家私头仔：工具。16.khǹg-leh thang 用：[放着备用]。17.kah 黏tī 椅条顶：[架在长板凳上]。18.三kâi 孔：三个洞。19.竹phòe ：[竹片]。20.lop -tī ：[套进在…]。21.thiòng-á ：thèng-hó(听好），可以。22.戳：chha̍k ，凿。23.tēng 柴：[硬木头]。24.khòa tī ：[搁置在…]。25.hōaⁿ 前车：操作机器叫hōaⁿ。26.绞正绞：[右旋转]。27.挽：bán，[用力挽住]。28.正手：[右手]。29.倒绞：[反转]。30.无股ê 索仔：亲像大条纱仔。31.拗做两koe̍h ：[折成两节]。32.倒退lu ：[倒退走]。33.khiú：giú 、[拉]。34.手挽脚kēng ：[手脚并用、稳住木柱]。35.伤lēng ：[太松了]。36.phàⁿ-phàⁿ ：[松松的，不够坚固]。37.ân ：[紧]。38.kiu：[缩]。39.soah 黄麻：[一片一片加黄麻下去]。40.bē 勇：[不坚固耐用]。41.和协会齐：[同心协力]。