《台湾谚语咸酸甜》

 | | | 转寄

三兄弟股一条琼麻索

作者 Lahjih 2007.07.15

琼麻就是龙舌兰，俗称树丝，因为伊树叶ê纤维，韧koh m̄惊水浸，提来股索á，坚固耐用，是讨海人ê重要工具，南部出产kài chē。

用琼麻股索á是m̄-bat看过，用黄麻绞索á，m̄但bat khoàiⁿ，囡á时代mā bat kap大人绞过，不过绞--è是两股ê索á，绞三股--è就无迄款功夫。

过去生活tī庄脚ê作穑人，担担ê畚箕、米lôa ài缚索á，载货、缚柴ài用索á liàu，牵牛、驾kha车、驶田、捆猪、拖车…步步lóng tio̍h用索á，索a2ti7田庄所在是生活必须品。细条索á用双手捻，抑是tiàm脚头u搓就会使chit，大条索若无用家私头á来股，是无可能ê代志，过去作田人若有闲工，就三五个招--leh，互相tàu相仝，扑几条á索a2khng3-lehthang用。

股索a2ai3用绞索á机，he是一套用木材做ê工具，前车是四角型ê框架，kah黏tī椅条顶，有三kâi孔，穿三支ㄣ字形ê铰á，前面会冻结索á，后面用一块竹phòe钻三kâi孔，拄好lop-tī三支绞á，thiòng-á三支同齐股tín动；后车kan-nā一支柴柱，半人koân ê所在mā戳一孔，仝款穿一支ㄣ字形ê绞á；另外有一粒羊á头形ê tēng柴，刻三条沟，beh hō͘三股ê黄麻khòa tī沟内，chiah会冻平平顺顺、pêⁿ-pêⁿ正正股成一条索á。

股索á tio̍h-ài三个人，一个hōaⁿ前车，顾hit三支绞á ê运转，绞正绞，一个固定后车，用倒手挽hit支柴柱hō͘固定，kohtioh8用正手股绞á，而且ài倒绞，hōaⁿ羊á头chiah是师傅，索á绞会súi lóng tio̍h靠iê功夫kap指挥。

Chit-mái开始beh绞索á--lò͘：前车先绞一支绞á，师傅提黄麻皮套tiàm绞á头，然后一皮一皮纺，纺一条五丈长ê无股ê索á，chiah koh纺一条两丈半--è,五丈--ē拗做两koe̍h，套tī后车，尾节套tī前车，chit-má前车三支绞á缚三条索，后车一支绞á mā缚三条索，师傅掠羊á头ùi前车hit旁套好势，然后一声开始，前后车股无停，师傅hōaⁿ羊á头顺索á股一直倒退lu，后车一直股一直hō͘索á khiú晋前，手挽脚kēng，惊做索á伤lēng，索á若伤lēng，绞khit来ê索á一定phàⁿ-phàⁿ，bē坚固耐用。

后车哪会行晋前呢？因为索á愈绞愈ân soah愈绞愈短，本来是两丈半，绞好可能chhun两丈两尺，kiu三尺算真正常。一条绞好即koh绞一条，beh大beh细，由在师傅斟酌soah黄麻，黄麻若soah chē，索á自然大条，黄麻若soah少，索á当然细条，若是绞两股ê索á就卡简单，可惜bē勇mā卡pháiⁿ看头，he是师á工学绞，绞chhit-thô--ē。

「三兄弟股一条琼麻索」，若有和协会齐，he是真简单，团结就是力量，看田庄人绞索á就是上好ê证明，早当时阮田庄兄弟leh绞索á，无一定是亲兄弟，却是合作团结ê力量是无teh比，因为庄内ê厝边隔壁lóng若亲兄弟，过去ê庄脚人，m̄免去强调啥物『敦亲睦邻，守望相助』，庄头ê安全就顾kah好势好势，时代leh变，社会一直变迁，古早味，古早ê人情味，使人怀念。

「三兄弟绞一条黄麻索」ê『团结力量』，会冻hō͘无论是国民党、民进党抑是新党ê兄弟做参考，「团结」ê团体，chiah是有向望--ē。





【注解】： 1.琼麻：khêng-môa。 2.纤维：chhiam-ûi。 3.韧：jūn。 4.股：kó͘。绞。 5.索á：[绳子]。 6.kài chē：真chē。 7.担担：taⁿ-tàⁿ。 8.米lôa：米箩。 9.liāu：[缠绕tio̍h绑物]。 10.kha车：驾牛ê器具。 11.步步：逐项。 12.捻：lián。 13.脚头u：[膝盖]。 14.搓：so。 15.家私头á：工具。 16.khǹg-leh thang用：[放tio̍h备用]。 17.kah黏tī椅条顶：[架在长板凳上]。 18.三kâi孔：三个洞。 19.竹phòe：[竹片]。 20.lop-tī：套进在…]。 21.thiòng-á：thèng-hó(听好），可以。 22.戳：chha̍k，凿。 23.tēng柴：[硬木头]。 24.khòa tī：[搁置在…]。 25.hōaⁿ前车：操作机器叫hōaⁿ。 26.绞正绞：[右旋转]。 27.挽：bán,[用力挽住]。 28.正手：[右手]。 29.倒绞：[反转]。 30.无股ê索á：亲像大条纱á。 31.拗做两koe̍h：[折成两节]。 32.倒退lu：[倒退走]。 33.khiú：giú、[拉]。 34.手挽脚kēng：[手脚并用、稳住木柱]。 35.伤lēng：[太松了]。 36.phàⁿ-phàⁿ：[松松的，不够坚固]。 37.ân：[紧]。 38.kiu：[缩]。 39.soah黄麻：[一片一片加黄麻下去]。 40.bē勇：[不坚固耐用]。 41.和协会齐：[同心协力]。