《台语荒漠甘泉（全罗版）》

 | | | 转寄

"Siōng gûi-kip ê sî"

作者 陈清俊 翻译 2007.10.14

listen


Cha̍p ge̍h cha̍p-sì (Cha̍p ge̍h cha̍p-sì ji̍t)

"Hut-jiân ū Chú ê thiⁿ-sài khiā tī piⁿ-thâu, pâng-lāi ū kng teh chiò, tah Pí-tek ê hia̍p-ē, kiò i chhíⁿ, kóng, Kín-kín khí-lâi, thih-liān chiū tùi i ê chhiú lak-khì." (Sù-tô͘ Hêng-toān 12:7)

"Nā-sī pòaⁿ-mî Pó-lô Se-lah kî-tó gîm si, o-ló Siōng-tè; koaiⁿ tī kaⁿ-ni̍h ê lâng iā chù-ì teh thiaⁿ; hut-jiân tōe tōa tāng, tì-kàu kaⁿ ê tōe-ki lóng iô-tāng; chiah ê mn̂g iā liâm-piⁿ lóng khui; chèng lâng ê hêng-kū it-chīn lak." (Sù-tô͘ Hêng-toān 16:25-26)

Che sī Siōng-tè kang-chok ê hong-hoat. Tī lán siōng o͘-àm ê sî, I tùi hái-bīn kiâⁿ lâi lán bīn-chêng; tī keh-ji̍t chiū beh chhú-sí ê Pí-tek, thiⁿ-sài lâi kàu Pí-tek ê kaⁿ-pâng. Tī koat-tēng beh chhù-koa̍t Bo̍k-tí-kái ê ba̍k-kè oân-sêng ê sî, kok-ông ê sit-bîn bōe-khùn ín-chhōa i chhái-chhú tùi Iû-thài bîn-cho̍k iú-lī ê hêng-tōng. (chham-khó Í-su-thiap tē 6 chiuⁿ).

Chhin-ài ê lêng, khó-lêng lí tio̍h keng-le̍k kàu siōng bái ê sî-khek chiah ōe tit chín-kiù, chóng-sī tio̍h chhim-sìn lí it-tēng ōe tit-tio̍h kiù! Siōng-tè khó-lêng ài lí thèng-hāu, tān-sī I éng-oán kì-tit I ê èng-ún, I ê ōe choa̍t-tùi bōe hòe-bô, sî nā kàu I ōe si̍t-chian73. --- F.B. Meyer

Siōng-tè ēng chin kán-tan ê hong-hoat chòe kè-ōe, I iā ū pá-ak tùi-hù jīm-hô khùn-lân ê lêng-le̍k. Tùi hiah ê sìn-khò I ê kiáⁿ-jî I ê sìn-si̍t lóng bô kái-ōaⁿ, á sī iô-tāng. I kian-siú I ê chong-chí. Tùi Iok-sek ê it-seng, lán thang khòaⁿ chhut, Siōng-tè tāi-seng thong-kè chi̍t ê tâng koaiⁿ-kaⁿ ê hoān-lâng, chià-tio̍h bāng, chòe-āu thong-kè i chiong Iok-sek tùi kaⁿ-lô chhōa chhut-lâi, chìn-ji̍p chòe Ai-ki̍p ê chái-siòng. Iok-sek chē kaⁿ ê kî-kan tú-hó sī hō͘ i chòe cháiⁿ-siòng só͘ su-iàu ê le̍k-liōng kap kian-tēng ì-chì.

Sìn-khò Siōng-tè só͘ ēng ê hong-hoat, chiàu I ê sî-kan-pió seng-oa̍h sī an-choân ê. --- Samuel Dickey Gordon

Siōng-tè chún-pī ū chi̍t chheng ki só-sî khì khui chi̍t chheng bô siâng ê mn̂g, ūi-tio̍h sī beh chín-kiù I ê kiáⁿ-jî, bô-koán chêng-hêng sī jōa kan-lân, gûi-hiám. Goān lán ōe tiong-sim lán ê chit-hūn, ūi I siū-khó͘, hō͘ Ki-tok chīn I ê pō͘-hūn, chiong bān-sū kau-thok tī I chiū kàu-gia̍h lah. --- George MacDonald

Khùn-lân, kî-si̍t sī hō͘ kî-chek sì-bīn pau-ûi teh, iā thang kóng, sī kî-chek khai-sí ê thâu-chi̍t kai-tōaⁿ. Nā-sī tōa ê kî-chek, i ê chiu-ûi m̄-nā sī khùn-lân, sī oân-choân bô-khó-lêng. Tān-sī chí-iàu su-iàu I ê kiáⁿ-jî khîⁿ tiâu I ân-ân-ân, chi̍t ê bô-bāng ê kio̍k-bīn ōe chiâⁿ-chòe Siōng-tè ê hí-lo̍k.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw