《台语荒漠甘泉（全罗版）》

 | | | 转寄

"O͘-àm khòaⁿ bô lō͘"

作者 陈清俊 翻译 2007.10.07

listen

Cha̍p ge̍h chhoe-chhit (Cha̍p ge̍h chhit ji̍t)

"Lín tiong-kan chí-chūi kèng-ùi Iâ-hô-hoa, thiaⁿ-thàn I ê lô͘-po̍k ê ōe ah? kiâⁿ tī o͘-àm bô-ū kng-bêng ê, tio̍h óa-khò Iâ-hô-hoa ê miâ, óa-khò i ê Siōng-tè." (Í-sài-a 50:10)

Sìn-tô͘ tú-tio̍h o͘-àm, chi̍t-chióng khùn-jiáu, hun-loān ê o͘-àm, m̄-sī sio̍k sim-lêng ê, sī lí-tì-siōng ê o͘-àm, beh án-chhóaⁿ? Tng chit-chióng o͘-àm lîm-kàu tī khiân-sêng, chiàu Siōng-tè chí-ì kiâⁿ ê sìn-tô͘, i siông-siông m̄-chai beh án-chóaⁿ chòe, iā m̄-chai tio̍h kiâⁿ tó chi̍t tiâu lō͘. I ê thiⁿ o͘-hûn tà lâi, chêng-bīn ê lō͘ bô kng, só͘-í i kám-kak ka-kī tī o͘-àm tiong kiâⁿ bô lō͘.

Chhin-ài ê sìn-tô͘, lí sī-m̄-sī tī che chōng-hóng? Tī o͘-àm tiong beh án-chóaⁿ? Tio̍h thiaⁿ Siōng-tè ê ōe. "Óa-khò Iâ-hô-hoa ê miâ, óa-khò i ê Siōng-tè." Sū-si̍t-siōng tī chit ê chêng-hêng, tāi-seng, chiū sím-mi̍h sū iā mài chòe. Tùi jîn-sèng khòaⁿ án-ni chòe (bô chòe sím-mi̍h sū) sī chin khùn-lân ê. Chi̍t kù sio̍k-gú kóng, "Tú-tio̍h kín-kip sū, m̄-thang bô-êng loān-loān chòe." Iā chiū-sī kóng, "tng lí iáu m̄-chai chêng-hêng, m̄-chai án-chóaⁿ chòe ê sî, sím-mi̍h iā m̄-thang chòe." Lí nā tú-tio̍h lêng-sèng siōng ê bê-he̍k, m̄-thang hiòng-chêng chhiong, ài chiong seng-oa̍h ê pō͘-tiāu piàn bān. Ū pit-iàu ê sî, chiong lí sìⁿ-miā ê chûn pàng chûn-tōa tī chúi-té (thêng-chí kiâⁿ), á-sī pa̍k tī bé-thâu.

Tī chit-sî sìn-khò Siōng-tè choa̍t-tùi bô m̄-tio̍h. Lán ê thâu-náu chiah ōe pêng-chēng, lāi-sim iā ōe pêng-an. Lán ài chiong lán ê chhiú khǹg tī I ê chhiú nih, chhin-chhiūⁿ gín-ná, hō͘ I chhōa lán ji̍p tī I thiàⁿ ê chhàn-lān kng-bêng nih. I chai kiâⁿ-chhut o͘-àm ê lō͘, só͘-í goān lán ōe khîⁿ-tiâu I, sìn-khò I ōe kiù lán, chí-sī lán kiâⁿ siōng-kín koh khó-khò ê lō͘. --- Pardington phok-sū

Ōe-kì-tit, tī lán m̄-chai kiâⁿ tó chi̍t tiâu lō͘-sòaⁿ ê sî, lán ū chi̍t ūi chhōa lán kiâⁿ ê chûn-tiúⁿ.

Kian-chhî, góa ê sim ah, kian-siú só͘ sìn ê chín-kiù,
Kian-siú kàu té ōe iâⁿ-tio̍h bián-liû,
Tī kông-hong po̍k-hō͘ tiong bo̍k-bo̍k-siû,
Bô tōa ê chûn it-tēng tò-chhù phiau-liû.

Tān-sī khîⁿ-tiâu Iâ-so͘ thong-kè chai-hāi,
Sui-jiân thiⁿ-tē kàu bô, iā beh khiā-chāi.
Kian-chhî, iu-siong ōe kè-khì,
Po̍k-hong ū-kò joa̍h-thiⁿ teh-beh lâi,

Si̍p-jī-kè sī ǹg lo̍k-hn̂g ê piáu-sī,
Bān-mi̍h Thiⁿ-pē thóng-tī!
Thêng-chí it-chhè hoâi-gî,
Kian-chhî, góa ê sim ah, kian-chhî, koh kian-chhî.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw