《台语荒漠甘泉（全罗版）》

 | | | 转寄

Chòe ông ê kang

作者 陈清俊 翻译 2006.11.12

listen



Cha̍p-it ge̍h cha̍p-jī ji̍t

"Chiah ê lâng lóng sī sio-hûi sai-hū, sī Nî-tha-èng kap Ki-te-la̍h khiā-khí ê peh-sìⁿ; in tī-hia kap ông khiā-khí, chòe ông ê kang." (I Le̍k-tāi-chì-lio̍k 4:23)

Lán thang tī jīm-hô ê só͘-chāi "kap ông khiā-khí, chòe ông ê kang." Lán khó-lêng siū-tiàu khì siōng bô khó-lêng ê só͘-chāi, tī siōng kan-lân ê chêng-hêng ūi Chú chòe kang. Khó-lêng tī chng-kha, kap Ông ê chin-chōe siâⁿ-lāi ê oa̍h-tāng keh-lī. Iā khó-lêng tī "hoe-hn̂g, kap lî-pa chhiū ê tiong-kan" ū chin-chōe chó͘-tòng kap that-gāi ûi teh. Iā lán khó-lêng sī sio-hûi sai-hū, chhiú nih ū kok-chióng ê hûi-á thô͘-phe, lâi oân-sêng lán múi-ji̍t ê kang-chok.

Tī tó-ūi lóng bô koan-hē, Ông an-pâi lán tī hia, I ōe lâi kap lán chòe-hé. Lî-pa, chó͘-gāi tùi lán iā ū lī-ek, nā-bô I chá chiū kā in sóa-khui loh. Kìⁿ-nā chó͘-tòng lán ê mi̍h-kiāⁿ, khó-lêng iā sī kā lán pó-hō͘, che kiám m̄-sī chin ha̍p-lí ê mah? Hûi-á phe, he sī I jīm-ûi sek-ha̍p hē tī lán chhiú tiong ê mi̍h, sek-ha̍p hiān-chāi ê "ūi ông chòe-kang." --- Frances Ridley Havergal

Chhin-ài ê, kàu lí ê hn̂g chòe-kang,
Kàu ji̍t lo̍h soaⁿ chiah pàng,
Khún chhiū-tîn, pa̍k hoe-châng,
Kàu Chú-lâng kiò chiū khin-sang.

Chīn lí ê la̍t jīn-chin chòe chheng-khì,
Chòe-kang m̄-sī lí ka-kī,
Khó-lêng tī keh-piah hn̂g chòe-kang ê i,
Siu-chéng i ê hn̂g, khòaⁿ tio̍h lí.

Ji̍t-lo̍h, sek-iông to-chhái, lia̍p-lia̍p-sih ê thiⁿ-chhiⁿ, úi-tāi ê koâiⁿ-soaⁿ, hoàn-iáⁿ kng ê hái-kéng, phang-bī móa sì-kòe ê chhân-iá, sin-sian iām-lē ê hoe, lóng bōe thang pí chi̍t ê thiàⁿ Chú ho̍k-bū sū-hōng Iâ-so͘ ê phó͘-thong-lâng koh khah bí-lē, koh-khah súi. --- Frederick William Faber

Siōng súi siōng sîn-sèng ê lêng-hûn sī siáⁿ-khoán? M̄-sī ū chhut-miâ ê, ū sū-gia̍p, kong-lô, lâu hō͘ lâng tui-su ê lâng. Sī chi̍t ê kè pêng-chēng, sèng-kiat seng-oa̍h ê lâng, tiām-tiām khui phang-phang ê hoe bô ài lâng chai, chhin-chhiūⁿ iu-kok bô lâng kàu chheng-chheng sió-khoe piⁿ khui ê pek-ha̍p-hoe. --- Kenelm Digby

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com.tw