《台语荒漠甘泉（全罗版）》

 | | | 转寄

"Tek-sèng ū chhun"

作者 陈清俊 翻译 2011.12.18

listen

Cha̍p-jī ge̍h cha̍p-poeh (Cha̍p-jī ge̍h cha̍p-poeh ji̍t)

"Hoán-tńg tī chiah ê lóng-chóng ê sū, lán tùi thiàⁿ lán ê, tek-sèng kàu ū chhun." (Lô-má 8:37)

Hok-im, Siōng-tè ê un-sù sī chin kî-biāu ê, ōe chiong te̍k-jîn, tùi-te̍k lán só͘-ū ê le̍k-liōng chi̍p khí-lâi, hòa-chòe pang-chān lán kiâⁿ ǹg thian-kok, khì kìⁿ Siōng-tè ê lō͘. Che ná chhin-chhiūⁿ eng-chiáu lī-iōng po̍k-hong ê le̍k-liōng chiâⁿ chòe i pe ǹg khong-tiong ê la̍t. Eng khiā tī koân-koân ê soaⁿ-gâi piⁿ chēng-chēng, khòaⁿ thiⁿ-sek teh àm, sih-nà teh sih, po̍k-hong teh kńg. Khòaⁿ chún-chún, chiū ǹg kiông-hong pe khì, lī-iōng hong ê la̍t chiong i ǹg khong-tiong pe koân.

Siōng-tè iā ài I múi chi̍t ê kiáⁿ-jî ōe án-ni, "tek-sèng kàu ū chhun". Chiong po̍k-hong-ú ê hûn piàn-chòe sèng-lī ê chiàn-chhia. "Tek-sèng kàu ū chhun" m̄-nā sī chiàn iâⁿ, chiong te̍k-jîn phah pāi, koh ōe tùi te̍k-jîn lâi tit in ê niû-si̍t, in ê ta̍k-chióng ê mi̍h. Che sī chit ê keng-chat chin-chiàⁿ ê ì-gī, m̄-nā phah-iâⁿ, koh ū chiàn-lī-phín thang the̍h.

Chhin-ài ê ki-tok-tô͘, tng lí keng-kè kiaⁿ-hiâⁿ thang-kiaⁿ ê khó͘-lān soaⁿ-kok āu, lí sī-m̄-sī ū tòa tio̍h chiàn-lī-phín lī-khui mah? Tng lí siū siong, í-keng teh-beh bô goân-khì ê sî, lí ū sìn-khò Siōng-tè, hō͘ lí chhut-khì ê sî pí lí ji̍p-lâi ê sî khah hong-sēng, hù-jū mah? Chòe chi̍t ê "tek-sèng kàu ū chhun" sī tùi te̍k-jîn hia tit chiàn-lī-phín, kui tī ka-kī, te̍k-jîn só͘ beh ēng che lâi kong-kek lí ê mi̍h piàn chòe lí ê, piàn-chòe tùi lí ū lō͘-ēng ê mi̍h.

Tī Eng-kok Bú-lâi-tùn, (Brighton, England) ū chi̍t ūi Mō͘-un phok-sū (Dr. Mo͘n), ū chi̍t ji̍t i hut-jiân sit-bêng, chhiⁿ-mî bô khòaⁿ-kìⁿ. I tùi Chú kóng, " Chú ah, góa tùi Lí tit-tio̍h sit-bêng, che sī chi̍t chióng ê châi-lêng, kiû Lí pang-chān góa, hō͘ góa ōe ēng che lâi êng-iāu Lí. Tī Lí chài-lîm ê sî, ōe liân-pún tài-lī lâi siu-hôe. (Má-thài 25:27). Āu-lâi tit-tio̍h Siōng-tè ê pang-chān, i hoat-bêng bông-jîn ê jī-bú, hō͘ chheng-chheng bān-bān ê bông-jîn ōe thang tha̍k Siōng-tè ê ōe, tit-tio̍h kiù-un ê tō-lí.

Siōng-tè bô chiong Pó-lô ê "jio̍k-thé ê chhì" tû-khì, (Ṳ Ko-lîm-to 12:7) Chú só͘ chòe ê koh-khah hó, hō͘ Pó-lô khek-ho̍k chit ki chhì, hō͘ chhì piàn chòe i ê lô͘-po̍k. Tòa chhì ê sū-hōng, tùi jîn-lūi ê kòng-hiàn pí chē tī ông-ūi (hióng-siū) ê sū-hōng khah úi-tāi.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org