《台语荒漠甘泉（全罗版）》

 | | | 转寄

"Oân-choân ê sūn-ho̍k"

作者 陈清俊 翻译 2011.08.14

listen


Poeh ge̍h cha̍p-sì (Poeh ge̍h cha̍p-sì ji̍t)

"Nā m̄-sī tùi téng-bīn hō͘ lí, chiū lí bô koân thang pān góa;" (Iok-hān hok-im 19:11)

Chi̍t ê siong-sìn koh chun-siú Siōng-tè chí-ì ê lâng, i só͘ tú-tio̍h ê múi chi̍t hāng sū, bô m̄-sī Siōng-tè ê ín-chún. Chit ê chin-lí chiū kàu-gia̍h hō͘ lán bô thêng ê kám-siā kap hí-lo̍k, in-ūi Siōng-tè ê chí-ì sī siōng ū ǹg-bāng, siōng hoaⁿ-hí, siōng êng-kng ê. Nā-sī lán choân-jiân ê sūn-ho̍k, choân-jiân ê siong-sìn, Siōng-tè chiū ōe choân-lêng ūi lán chòe sū, sī bô chi̍t chióng ê la̍t chó͘-chí ōe tiâu.

Chi̍t ê keng-le̍k kè chhim-chhim thòng-khó͘ ê lâng siá phoe hō͘ pêng-iú án-ni kóng:

Chi̍t hāng sū bô lūn sī jōa bô kong-tō, sīm-chì sī Sat-tàn pún-sin lâi pìⁿ-báng, chi̍t ē lîm-kàu tī lán ê sin-chiūⁿ, chiū chiâⁿ-chòe sī Siōng-tè ê chí-ì, kàu-bé lóng sī lán ê lī-ek. Che kiám m̄-sī lán ke̍k tōa ê êng-kng mah?

“Bān-hāng sū ta̍uh-ta̍uh lâi, lóng sī beh hō͘ thiàⁿ Siōng-tè ê lâng tit lī-ek.” (Lô-má 8:28) Siūⁿ-khòaⁿ-māi, Iâ-so͘ tī siū-bōe hit sî só͘ kóng ê “Góa ê pē só͘ hō͘ góa ê poe, góa kiám thang bô lim mah?” (Iok-hān hok-im 18:11)

Lán nā choân-jiân seng-oa̍h tī Siōng-tè ê chí-ì nih, sī chiok súi ê, Sat-tàn chioh pa̍t-lâng ê chōe lâi kong-kek lán, iā sī bô kàu la̍t thang hām-hāi tio̍h lán, chit ê khiok beh chiâⁿ-chòe Siōng-tè ê chiok-hok. --- Hannah Whitall Smith

Góa khiā tiàm,
Siōng-tè chí-ì ê tiong-sim-tiám,
Bô sím-mi̍h cha̍p-liām,
Lóng sī kap I lâi saⁿ-liâm.
It-chhè chin súi, bô thang hiâm,
In-ūi Siōng-tè chòe góa it-seng ê kè-ōe kap hong-chiam.

Góa kiám ōe thong-kè it-liân-chhoàn ê thòng-khó͘?
Kàu sî góa ōe chai, che lóng sī tùi góa ū pang-chō͘,
Sui-jiân góa m̄-chai goân-in jû-hô,
Góa siong-sìn, sī Siōng-tè teh koàn-kò͘.
Siōng-tè sī sìn-si̍t, sī thiàⁿ-sioh,
Hō͘ góa oân-choân pêng-an ê an-hioh.

Ū chhut-ji̍t, iā ū im-iáⁿ,
Ū hí-lo̍k, iā ū thàng-thiàⁿ,
Chú, góa sìn-jīm Lí! Nn̄g hāng lóng sī thiàⁿ.
Lí teh hùn-liān Lí ê kiáⁿ.
Goán beh chai-iáⁿ,
Tē-chiūⁿ ê sún-sit beh chiâⁿ thiⁿ-nih ê khah-iâⁿ. --- I.G.W.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org