《台语荒漠甘泉（全罗版）》

 | | | 转寄

"Khai-khún soaⁿ-tē"

作者 陈清俊 翻译 2011.02.13

listen

Jī ge̍h cha̍p-saⁿ (Jī ge̍h cha̍p-saⁿ ji̍t)

“Soaⁿ-tōe iā beh kui lí; sui-jiân sī chhiū-nâ, lí iā thang chhò i; i ê ke̍k-thâu iā beh sio̍k lí.” (Iok-su-a 17:18)

Pîⁿ-iûⁿ, soaⁿ-kok tòa móa Ka-lâm lâng, in ū thih-chhia, kiông-tōa ū-la̍t, chó͘-tòng lín chiân-chìn. Soaⁿ-tē khui-khoah, móa sī chhiū, sī lí ló͘-le̍k hoat-tián ê só͘-chāi.

Kim-ji̍t tng lí hoat-kiàn bōe-tàng ūi Siōng-tè chòe-kang, lí thang ūi-tio̍h hiah-ê ōe-tàng ê lâng lâi kî-tó. Lí bōe-tàng ēng lí ê le̍k-liōng, lí ê ōe-gú lâi thui-tián tē-chiūⁿ ê kang-chok, lí thang ēng kî-tó lâi kám-tōng thiⁿ nih ê tōa le̍k-liōng lâi chòe-kang. Lí kám-kak tī soaⁿ-kha bōe-tàng chìn-tián lí ê sū-kang, ū seng-oa̍h ap-le̍k, siū chó͘-chí, sū-sū bô sūn-lī, lí thang chiong gán-kong ǹg khah koân ê soaⁿ-tē, thiⁿ-nih, khòaⁿ-bōe-tio̍h, éng-kiú-sèng ê kéng-kài khì chòe.

Lâng ēng sìn-sim lâi khai-khún soaⁿ-tē. Í-sek-lia̍t lâng chai soaⁿ-nih ū chōe-chōe chu-goân, châi-pó, ū hong-hù ê tōa chhiū-nâ khì khai-khún. Siōng-tè ài in khì soaⁿ-nih khai-khún ê tōa kang-chok, khòaⁿ khí-lâi sī bô khó-lêng ê tōa kang-tiâⁿ. M̄-sī beh hō͘ in kiaⁿ kah hoe-sim, hoán-tńg sī beh ài in ū sìn-sim, ū lêng-le̍k ōe chòe in só͘ siūⁿ kóng bô-khó-lêng ê sū. Chit ê le̍k-liōng sī khò-tio̍h Siōng-tè só͘ sù sèng-lêng ê tāi-lêng, chiah hoat ōe chhut-lâi.

Lâng ōe ū khùn-lân sī ūi sím-mi̍h? Ài lán ēng sìn-sim khò kî-tó kap ló͘-le̍k kang-chok, Siōng-tè ê lêng-le̍k chiū ōe hián-hiān chhut-lâi. Tī soaⁿ-kok tiong tú-tio̍h sì-bīn siū ûi-khùn mah? “Chiū hō͘ i khiâ tī tōe-chiūⁿ koân ê só͘-chāi, tit-tio̍h chia̍h chhân--nih ê thó͘-sán; koh hō͘ i tùi chio̍h-pôaⁿ suh-bi̍t, tùi hé-chio̍h suh-iû.” (Sin-bēng-kì 32:13) Ài ǹg koân ê tē, tùi chio̍h-pôaⁿ ni bi̍t chhut-lâi. Lâng khòaⁿ-chòe bô-khó-lêng,lóng beh piàn-chòe khó-lêng. Tùi soaⁿ-tē chhú tin-pó.

Sím-mi̍h hûiⁿ(hoâiⁿ) bōe kè ê tōa-chúi,
Sím-mi̍h chǹg bōe thàu ê soaⁿ-tui,
Goán sī te̍k-sû kang-têng tūi,
Choan-bûn chòe “bô khó-lêng” ê lūi.
--- Panama ūn-hô kiàn-tio̍k kang-lâng ê koa


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org