《台语荒漠甘泉（全罗版）》

 | | | 转寄

"Chúi-tiong keng-kè"

作者 陈清俊 翻译 2011.02.06

listen



Jī ge̍h chhoe-la̍k. (Jī ge̍h la̍k ji̍t)

“I chiong hái piàn-chòe ta-tōe; in pō͘-kiâⁿ kè-hô; tī-hia goán in-ūi I lâi hoaⁿ-hí.” (Si-phian 66:6)

“Pō͘-kiâⁿ kè-hô” á-sī “keng-kè chúi tiong” chit kù ōe chin ū ì-sù. Lâng tī chúi tiong tû-liáu kiaⁿ-hiâⁿ, chhiong-kông, sit-bāng, kiaⁿ sit-lo̍h sìⁿ-miā; kiám iáu ū sím-mi̍h kî-thāi mah? Chóng-sī tī-chia, Í-sek-lia̍t bîn-chiòng khiok “lâi hoaⁿ-hí”.

Jōa-chōe lâng tī chit chióng chêng-hêng ōe siūⁿ-tio̍h pún-sin ê chêng-kéng. Tng lán tī thòng-khó͘, iu-siong ê sî, lán kiám ōe chhin-chhiūⁿ Í-sek-lia̍t lâng lâi hoaⁿ-hí, lâi chhiùⁿ-koa, thiàu-bú neh?

Khò-tio̍h Thiⁿ-pē ê èng-ún, I kap lán hô-téng ê chiap-kūn. Chiah ê èng-ún hō͘ lán thâu-chêng ê lō͘ tit-tio̍h kng chiò. Chóng-sī it-tàn khoân-kéng piàn hó, seng-oa̍h hù-jū āu, lán chiū bô khòaⁿ-kìⁿ Thiⁿ-pē ê èng-ún. Chhin-chhiūⁿ tī ji̍t-sî khòaⁿ-bōe-tio̍h chhiⁿ-sîn chi̍t-iūⁿ. Kàu thiⁿ àm, chiū-sī iu-siong lâi-lîm ê sî, chèng chhiⁿ-sîn koh tī thiⁿ-nih kng-nà-nà, iā tòa Thiⁿ-pē pó-kùi ê èng-ún, lâi an-ùi lán.

Ngá-kok tī Ngá-phok ê tō͘-thâu só͘ keng-le̍k ê: tī àm-sî, ji̍t-thâu lo̍h-soaⁿ, Chú ê sù-chiá chhut-hiān, kap i tàu-la̍t, sio-ián. Ngá-kok lâi khah iâⁿ. Tōa chè-si A-lûn iā sī tī mî-sî, hông-hun ê sî (Chhut-ai-ki̍p-kì 30:8) chiong hōe-bō͘ sèng-só͘ ê teng tiám-to̍h. Ki-tok-tô͘ ê teng iā-sī tī khó͘-lān ê mî-sî tiám khí-lâi, chit ê sî chiò tio̍h siōng kng-liāng.

Sù-tô͘ Iok-hān sī tī pī hòng-tio̍k ko͘-toaⁿ ê sî, kìⁿ-tio̍h Kiù-sio̍k-chú tī êng-kng tiong hián-hiān. Kin-á-ji̍t, lán tiong-kan ū lâng iā seng-oa̍h tī “Poa̍t-mô͘” ê hái-tó (Iok-hān siū hòng-tio̍k ê só͘-chāi) nih, iā-ū Thiⁿ-pē kap lán tông-chāi ê bû-hān kong-hui hôe-e̍k nih. Sui sī ko͘-to̍k, iu-siong tiong, iā tit-tio̍h I un-tián, chû-ài ê chín-kiù, hō͘ lán thoat-lī jio̍k-thé ê ko͘-toaⁿ kap khó͘-lān.

Kim-ji̍t iáu kiâⁿ tī sè-kan thòng-khó͘ ê Âng-hái á-sī Iok-tàn hô ê thian-lō͘-kheh. Ū jōa-chōe lâng ōe éng-oán kì-tit Thiⁿ-pē úi-tāi jîn-chû bí-hó ê hôe-e̍k, thang kiàn-chèng kóng, Goán beh “kiâⁿ tī chúi-nih” ê kiàn-chèng. Sīm-chì hiān-kim iáu tī im-im àm-àm ê keng-le̍k tiong, hái-éng tī sì-ûi hoa-hoa-háu, ū jōa-chōe lâng ōe thêng lo̍h-lâi kóng, goán beh in-ūi Lí lâi hoaⁿ-hí. (J.R. Macduff)

“Góa iā beh tùi-hia siúⁿ-sù i phû-tô-hn̂g, koh siúⁿ-sù i A-kat ê soaⁿ-kok, chòe ǹg-bāng ê mn̂g, i beh tī-hia ìn-siaⁿ, kap siàu-liân ê ji̍t bô koh-iūⁿ;” (Hô-se-a 2:15) Piáu-sī Í-sek-lia̍t lâng tong-nî siū-khó͘ ê kok ōe hòa-chòe thang chiok-hok ǹg-bāng ê mn̂g.

Tī chúi-tiong, o͘-àm iu-siong tiong, khò Chú lâi hoaⁿ-hí.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org