《台语荒漠甘泉（全罗版）》

 | | | 转寄

"Kiàn-chèng, Hiòng āu-bīn hoah"

作者 陈清俊 翻译 2010.12.19

listen


Cha̍p-jī ge̍h cha̍p-káu (Cha̍p-jī ge̍h cha̍p-káu ji̍t)

"Chiah ê sū beh chiâⁿ-chòe lín ê kan-chèng." (Lō͘-ka 21:13)

Seng-oa̍h ná peh-soaⁿ, peh tī thâu-chêng ê lâng "hiòng āu-bīn hoah" hoaⁿ-hoaⁿ hí-hí hun-hióng thâu-chêng ê lō͘-tô͘ sī chi̍t chióng ê kó͘-lē. Lán chòe-hé teh peh, só͘-í eng-kai hō͘-siong pang-chān. Jîn-seng ê peh-soaⁿ sī giâm-siok, êng-kng ê sū-gia̍p. Su-iàu khùi-la̍t, kap kian-tēng ê ì-chì, chiah ōe ta̍t kàu soaⁿ-téng. Ná peh ná koâiⁿ, lán ê sī-iá iā ná khòaⁿ ná khoah, koh ōe hoat-hiān sin-sian tiōng-iàu ê mi̍h, eng-kai "hiòng āu-bīn hoah" lâi kó͘-lē lâng.

Nā-sī lí tī góa thâu-chêng chi̍t-tiám-á, "hiòng āu-bīn hoah," lâi hoán-èng,
Ōe hō͘ góa hoaⁿ-hí, pang-chān góa kiâⁿ tī chio̍h-thâu-lō͘ téng;
Nā-sī sìn-sim ê teng teh àm, in-ūi iû bô kàu ēng,
Lí ê hoah beh ín-chhōa góa ià-siān tè-bōe-tio̍h ê lō͘-thêng.

"Hiòng āu-bīn hoah," Kā góa kóng I án-chóaⁿ tòa lí keng-kè hong-hō͘,
"Hiòng āu-bīn hoah," kóng I án-chóaⁿ pó-siú lí tī chhiū-nâ ê kha-pō͘,
Kóng-khí tng lûi tân, tē tāng, iô sóa che soaⁿ lō͘,
I án-chóaⁿ chhōa lí, phō lí, tòa lí kàu an-choân ê tē-pō͘.

Pêng-iú ah, "Hiòng āu-bīn hoah," in-ūi góa khòaⁿ bōe-tio̍h lí ê bīn,
Lâng kóng, lí ū móa-bīn sèng-lī ê kong-hui, lí ê kha-pō͘ kín koh khin,
Chóng-sī tī lán tiong-kan ū hûn-bū, góa ê lêng-gán àm-tām,
Góa khòaⁿ bô êng-kng, sui-jiân khat-bō͘ thiaⁿ I ê ōe-tâm.

Ká-sú lí kóng I thiaⁿ lí ê kî-tó, sui-jiân chí-sī ēng tōa-siaⁿ hoah,
Ká-sú lí kóng I khòaⁿ-kò͘ lí, sui sī tī chhiong-móa chōe-ok ê bê-keng;
Nā-sī lí tī góa thâu-chêng chi̍t-tiám-á, "hiòng āu-bīn hoah,"
Ōe hō͘ góa an-sim, pang-chān góa kiâⁿ tī chio̍h-thâu-lō͘ téng;



附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org