《台语荒漠甘泉（全罗版）》

 | | | 转寄

"Siú só͘ sìn ê tō"

作者 陈清俊 翻译 2010.12.12

listen

Cha̍p-jī ge̍h cha̍p-jī (Cha̍p-jī ge̍h cha̍p-jī ji̍t)


"taⁿ góa ê huih teh chòe koàn-tiān, góa kè-sì ê kî kàu lah. Góa í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí." (Ṳ Thê-mô͘-thài 4:6-7)

Chhin-chhiūⁿ lāu-peng ài kóng-khí kè-khì chham-ka ê chiàn-cheng, kap tio̍h siong ê kò͘-sū, Lán kàu tī thian-tông iā ōe tâm-lūn Siōng-tè ê bí-hó kap sìn-si̍t, I chi̍t lō͘ án-chóaⁿ chhōa lán keng-kè múi chi̍t ê chhì-liān. Góa bô ài lâng chhēng iûⁿ-ko ê huih sóe kàu pe̍h-pe̍h ê saⁿ (Chham-khó Khé-sī-lio̍k 7:14) án-ni tùi góa kóng "chiah ê lâng lóng sī keng-kè tōa chai-lān chhut lâi ê, chí-ū lí m̄-sī."

Lí ài khiā tī hia hō͘ lâng kóng lí sī î-it bô keng-le̍k kè iu-hoān ê sèng-tô͘ mah? Tong-jiân bô ài! Nā-sī án-ni, lí beh kám-kak ka-kī chhin-chhiūⁿ tī sîn-sèng thoân-khè tiong ê siⁿ-hūn-lâng. Só͘-í goān lán hoaⁿ-hí chham-ú cheng-chiàn, bô-kú lán beh thâu tì êng-koan, chhiú giâ chang-chhiū ki lâi o-ló. --- Charles H. Spurgeon

Tng Bí-kok lāi-chiàn (lâm-pak chiàn-cheng), tī Siú-bāng-soaⁿ (Lookout Mountain, in Tennessee) chiàn-iá tiong, kun-i mn̄g chi̍t ê sū-peng siong tī tó-ūi? Siong-peng hôe-tap kóng tī kūn soaⁿ-thâu ê só͘-chāi. I só͘ siūⁿ ê m̄-sī i sin-thé tio̍h-siong ê só͘-chāi, kán-ta kì-tit i í-keng chiap-kūn soaⁿ-téng lah.

Goān lán iā ūi Ki-tok chòe khah tōa ê sū, bô hioh-khùn ti̍t kàu soaⁿ-téng, tī hia tōa siaⁿ hoah kóng, "Góa í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí."

Chòe oân kang, hioh-khùn, lóng bô thêng, kàu hit ji̍t,
In-ūi Siōng-tè ê an-hioh hō͘ lí, chiah sī éng-oán-tit.

Siōng-tè kiám-giām lí ê it-seng, m̄-sī khòaⁿ lí ū jōa-chōe chióng-chiong, ha̍k-ūi, kap bûn-pêng, chí-sī khòaⁿ lí sin-chiūⁿ ū jōa-chōe cheng-chiàn só͘ lâu ê siong-hûn.
Ū chi̍t ê tiong-kó͘ sî-tāi ê koa-siú án-ni o-ló i ê eng-hiông:

Chhiú giâ i ê pó-kiàm,
Kiàm-téng bô chng-thah, bô ui-giâm,
Chí-ū kiàm ê khih-kak koh bô chiam.

Khiân-sêng ê lâng só͘ tui-kiû siōng koâiⁿ ê êng-iāu sī sū-hōng ê siong-hûn, ūi-tio̍h só͘ beh tit pò-siúⁿ ê koan-bián lâi hi-seng, ūi-tio̍h Ki-tok siū lêng-jio̍k, ūi-tio̍h Chú ê sū-kang hi-seng sìⁿ-miā.




附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org