《台语荒漠甘泉（全罗版）》

 | | | 转寄

"Jú thoàn-liān, Jú kè-ta̍t"

作者 陈清俊 翻译 2010.10.24

listen


Cha̍p ge̍h jī-sì (Cha̍p ge̍h jī-cha̍p-sì ji̍t)

"Góa beh hō͘ lí chòe phah gō͘-kak sin ê khì-kū, lāi koh ū khí;." (Í-sài-a 41:15)

Tī jī-cha̍p sè-kí chho͘, chi̍t tiâu kǹg-thih kè-ta̍t gō͘ kho͘ bí-kim, nā-sī chiong chit tiâu thih phah chòe (thih ê) bé-tê, chiū kè-ta̍t cha̍p kho͘, chòe kǹg-chiam ê sî, chiū kè-ta̍t saⁿ-pah gō͘-cha̍p kho͘, nā-sī chè-chòe to-phìⁿ chiū kè-ta̍t kàu saⁿ bān nn̄g chheng kho͘, chè-chòe chhiú-pió ê hoat-tiâu kè-ta̍t cheng-ka kàu jī-cha̍p-gō͘ bān kho͘. Lí khòaⁿ chi̍t tiâu kǹg-thih keng-kè siū kòng siū phah chiah ōe cheng-ka kè-ta̍t, jú tûi, phah, hé-sio, bôa, kè-ta̍t jú koâiⁿ.

Ēng chit ê phì-jū thê-chhíⁿ lán ài an-chēng, jím-siū khó͘-lān, in-ūi siū-khó͘ jú chōe ê lâng, i ê kè-ta̍t, tit chiok-hok jú tōa. Siōng-tè thong-kè thòng-khó͘ hō͘ lán ōe hoat-hui siōng tōa ê châi-lêng, ūi tio̍h I ê êng-iāu kap pa̍t-lâng ê hēng-hok.

Oh, Sù Lí ê lô͘-po̍k:
Jím-nāi, ōe an-chēng sūn Lí an-pâi,
Ióng-khì, ōe choân-sim óa-khò Lí, bô siū hām-hāi,
Tì-hūi, bô bê-lō͘ ka-kī húi, thàn chit ê sè-tāi,
Thiàⁿ-thàng, hiān-sî sui ū khó͘-thàng, chai an-hioh chū-chāi.

Lán ê sìⁿ-miā chin ò-biāu, sū-si̍t-siōng, oân-choân bōe thang kái-sek, tû-liáu kóng, Siōng-tè chún-pī lán khì éng-oán ê sè-kài, chham-ú tī hia, hiān-chāi só͘ khòaⁿ-bōe-tio̍h ê sū-kang. Hiah ê te̍k-sû ê sū-kang su-iàu keng-kè hé ê thoàn-liān, ū chhin-chhiūⁿ kǹg ê lêng-sèng.

Kang-chhiūⁿ chòe ê to, jú lāi jú súi ê, sī jú iōng-sim chòe ê.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.org