《台语荒漠甘泉（全罗版）》

 | | | 转寄

"Koh-oa̍h"

作者 陈清俊 翻译 2010.04.25

listen

Sì ge̍h jī-gō͘ (Sì ge̍h jī-cha̍p-gō͘ ji̍t)

"Ū Boa̍t-tāi-lia̍p ê Má-lī-a, kap pa̍t ê Má-lī-a tī hia, chē tī bōng ê tùi-bīn." (Má-thài 27:61)

Ah, lâng tī pi-ai ê sî, chin oh khì khòaⁿ chheng-chhó, oh bêng-pe̍k, oh khì liáu-kái! Pi-siong hō͘ lâng thâu-khak khang-khang, bô goān-ì khì o̍h, khì bêng-pe̍k tāi-chì. Pi-ai ê hū-lú "chē tī bōng ê tùi-bīn," in kiám ōe khòaⁿ-tio̍h nn̄g chheng nî āu ê sèng-lī sêng-kó mah? Tû liáu chhē bô Ki-tok, in kiám ū khòaⁿ-tio̍h sím-mi̍h mah?

Lí góa só͘ chai ê Ki-tok chiū-sī tùi in só͘ sit-khì ê. Tùi in ê pi-siong, ū chin-chōe ai-thòng siong-sim ê lâng khòaⁿ-tio̍h koh-oa̍h ê ǹg-bāng. Boa̍t-tāi-lia̍p ê Má-lī-a siong-sim kàu bô khòaⁿ-tio̍h koh-oa̍h ê khai-sí. In siūⁿ sī sìⁿ-miā ê kiat-sok, khiok sī Ki-tok chòe ông siū ka-bián ê chún-pī. Ki-tok tiām-tiām siū tèng, tán-thāi I koh-oa̍h ê tōa lêng-le̍k.

Hū-lú bô khòaⁿ-tio̍h chit tiám, in ai-thòng, thî-khàu, cháu-khì, koh siong-sim hôe kàu hûn-bōng hia. Chóng-sī só͘ khòaⁿ ê, iáu chí-sī chi̍t ê bōng nā-tiāⁿ, bô siaⁿ-im, bô tiāu-thâu.

Lán iā sī siâng-khoán. Múi chi̍t lâng tī ka-kī ê hoe-hn̂g ni̍h, chē tī hûn-bōng tùi-bīn, kóng, "Chit ê chhám-ke̍k sī bô i ê, bô pān-hoat thang pó͘-kiù ê, góa khòaⁿ bōe tio̍h ū sím-mi̍h lī-ek, iā bōe thang tùi i lâi tit-tio̍h an-ùi." Chóng-sī tī lán siōng tîm-tāng, siōng pi-siong ê ge̍k-kéng tiong, lán ê Ki-tok tī hia, tán-thāi koh-oa̍h.

Tī lán chha-put-to beh sí-khì ê sî-chūn, Lán ê Kiù-chú tī hia. Lán hi-bōng ê chīn-bé, beh khòaⁿ tio̍h siōng kng-bêng ê kong-hui khai-sí chhut-hiān. Tī siōng o͘-àm tiong, sī chún-pī siōng chhàn-lān ê kng chhut-hiān. It-tàn lán tit-tio̍h thé-giām, chiū ōe hoat-hiān lán ê hoe-hn̂g ê kéng-sek bô hō͘ hûn-bōng phò-hoāi.

Tòa-ū pi-siong ê hí-lo̍k, chit ê hí-lo̍k koh-khah ū ì-gī. Tng Siōng-tè ê hí-lo̍k chèng tī lán ê chiu-ûi, lán ê pi-siong beh koh-khah chhàn-lān kng-bêng. Khí-thâu hoe-hn̂g ê hoe khó-lêng m̄-sī lán só͘ sim-ài ê, lán beh ha̍k-si̍p tio̍h hiah ê siⁿ tī sim tiong ê hoe. Tī hûn-bōng piⁿ ki-tok-tô͘ sim tiong só͘ chai-chèng ê hoe, ū thiàⁿ, ǹg-bāng, sìn-sim, hí-lo̍k kap pêng-an.

Chit tiâu iu-siong ê lō͘-kiô,
Ki-tok chìn-ji̍p an-hioh,

Tī chia, sī teh chhē mûi-kùi hoe,
Á-sī siū chiok-hok ê tē?
Thian-tông siōng pe̍h ê pek-ha̍p-hoe,
Khui tiàm jîn-kan hoān-lān chhì-phòe.
Tī chia, I khiam-pi pē si̍p-jī-kè,
Tī hia, ū ông ê chí-phàu chhēng-teh.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com