《台语荒漠甘泉（全罗版）》

 | | | 转寄

"Chia̍h kín kòng phòa óaⁿ"

作者 陈清俊 翻译 2010.04.18

listen


Sì ge̍h cha̍p-poeh (Sì ge̍h cha̍p-poeh ji̍t)

"I beh hō͘ i chiâⁿ." (Si-phian 37:5)

Góa bat án-ni siong-sìn, tng góa kî-tó soah, góa ài ló͘-le̍k khì chhē-kiû kái-koat, che sī góa ê chek-jīm. Chóng-sī Siōng-tè kà góa ū khah hó ê hong-hoat, hō͘ góa chai ka-kī ê ló͘-le̍k siông-siông ōe chó͘-tòng tio̍h I ê chok-ûi. I khé-sī góa tng góa kî-tó liáu, ài tùi I ū sìn-sim, chiong sū kau-thok I, ēng o-ló ê sim thèng-hāu, chí-iàu chòe I chí-sī góa só͘ tio̍h chòe ê sū. Chēng-chēng thèng-hāu, sím-mi̍h sū iā bô chòe, oân-choân sìn-khò Chú. Che hō͘ lán ōe kám-kak tio̍h bô pá-ak ê khoán-sit, che sī chin tōa ê iú-he̍k, lóng ōe hō͘ lán siūⁿ beh ka-kī khì tàu saⁿ-kāng.

Lán chai, tng chi̍t ê lâng tī chúi ni̍h beh im sí ê sî, i lóng ōe siūⁿ beh pang-chān khì kiù i ê lâng, chóng-sī, che lóng sī cheng-ka khì kiù ê lâng ê khùn-lân. Chú thè lán khì cheng-chiàn, lán khiok ài pún-sin piàⁿ-miā siūⁿ beh ka-kī khì chiàn, sī cheng-ka Chú ê khùn-lân. Che m̄-sī Siōng-tè m̄-khéng, sī I bô pān-hoat chìn-hêng, in-ūi lán ê kan-sia̍p hóng-gāi tio̍h I ê kang-chok. --- C.H.P.

Tng lán khò sè-kan-siōng le̍k-liōng ê sî, cheng-sîn ê le̍k-liōng chiū hoat-hui bōe chhut-lâi. Lán siông-siông bô hō͘ Siōng-tè kang-chok ê ki-hōe. Lán bô bêng-pe̍k I hôe-tap lán ê chhéng-kiû sī su-iàu sî-kan. Siōng-tè hō͘ mûi-kùi hoe sek-tì, á-sī chèng chi̍t-châng siông chhiū lóng su-iàu sî-kan. I iā su-iàu sî-kan hō͘ tiū-chhân lâi chhut bí hō͘ lâng chia̍h, Seng ài chún-pī thô͘, chiong thô͘ chhòng hō͘ i sang, su-iàu hō͘-chúi lâi lūn-te̍k, I sù sìⁿ-miā ê oa̍h-khì, jia̍t-khì lâi puh-gê, sêng-tióng, kàu kiat-si̍t ū chin-chōe chhek-á, chòe-āu chiah ū bí thang hō͘ iau-gō ê lâng chia̍h.

Só͘ ū ê sū lóng su-iàu sî-kan. Só͘-í lán chèng-chhân, lê-chhân, pò͘-chhân, jiân-āu ài thèng-hāu koh siong-sìn, ti̍t-kàu I ê chí-ì si̍t-hiān. Lán tùi chèng-chhân bêng-pe̍k chit ê goân-chek, lán ê kî-tó seng-oa̍h iā su-iàu o̍h siāng-khoán ê kà-sī. Siōng-tè su-iàu sî-kan hôe-tap lán ê kî-tó. --- J.H.M.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com