《台语荒漠甘泉（全罗版）》

 | | | 转寄

"Siⁿ sí kè-ta̍t-koan"

作者 陈清俊 翻译 2009.10.11

listen


Cha̍p ge̍h cha̍p-it (Cha̍p ge̍h cha̍p-it ji̍t)

"chhin-chhiūⁿ beh sí, kî-si̍t sī oa̍h." (Ṳ Ko-lîm-to 6:9)

Kū-nî góa chèng chi̍t-phiàn chí-sek hoe (asters) tī hoe-hn̂g nih, ū sió-khóa khah bān, chóng-sī iā khui liáu chin súi. Ū-ê í-keng khui-hoe kiat-chí, ū-ê chiah teh-beh khui-hoe. Kàu lo̍h-sng ê sî, chit-phiàn hoe hō͘ sng tàng-sí, súi-súi ê hoe lóng sí-khì-lah. Ah, in tòng bōe-kè hân-léng ê thiⁿ-khì, lóng-chóng sí-liáu-liáu.

Kui ê tang-thiⁿ lóng bô koh chhap hoe-hn̂g ê sū, in-ūi chí-sī chi̍t ê hoe ê bōng-á-po͘. Chóng-sī kúi lé-pài chêng, hn̂g-teng (choh-sit-lâng) kiò góa chù-ì khòaⁿ, kui phiàn ê hoe-hn̂g hoat chhut gō͘-cha̍p gōa châng ê chí-sek hoe châng. Goân-lâi góa só͘ siūⁿ in lóng hō͘ sng-seh tàng-sí lah. Chóng-sī sng-seh, tang-thiⁿ ê léng-hong kiám ōe thang tùi in chòe sím-mih?

Sng-seh ōe toa̍t-khì góa ê hoe, húi-hoāi hoe, hiat in tī thô͘-kha. Sng-seh tang-hong ēng pe̍h-seh ê kha ta̍h hoe-hn̂g, chòe oân in ê kang-chok kóng, "Che chiū-sī lín ê boa̍t-ji̍t lah." Chóng-sī chhun-thiⁿ kàu, siū sún-hoāi ê múi chi̍t châng chí-sek hoe, ū gō͘-cha̍p châng peh khí-lâi kiàn-chèng kóng, "goán chhin-chhiūⁿ sí khì, kî-si̍t sī oa̍h-teh."

Si̍t-bu̍t ê sè-kài sī án-ni, Siōng-tè kok iā sī án-ni, thong-kè sí, tit-tio̍h éng-oán-oa̍h. Tùi Iâ-so͘ ê siū-tèng sí tī si̍p-jī-kè kap hûn-bōng, tòa kàu éng-oán oa̍h ê Siōng-tè ê pó-chō kap sèng-tiān lāi. Khòaⁿ, ná sit-pāi, kî-si̍t sī sèng-lī.

Só͘-í bo̍h-tit kiaⁿ siū-khó͘, á sit-pāi. Che sī thong-kè "chhin-chhiūⁿ siū chek-hoa̍t, kî-si̍t bô tì-kàu sí." (Ṳ Ko-lîm-to 6:9) Sī thong-kè siū phah, thiah kàu chhùi-chhùi-chhùi, soah hō͘ lán piàn-chòe ū lêng-le̍k ê lâng. Tùi chi̍t ê sìn-tô͘ ê kian-sim jím-nāi siū-khó͘, chiah ōe sán-seng chi̍t tōa tui ê sìn-tô͘.

Ū lâng hō͘ sū ê piáu-bīn só͘ le̍k-tio̍h, kun-tè sè-kan ê tiâu-liû. In ê hoe khó-lêng sī kín-kín bō͘-sēng, chiām-sî ê heng-ōng, tān-sī in ê kiat-kio̍k sī éng-oán ê sí-bông. --- Henry Ward Beecher

Sìⁿ-miā ê kè-ta̍t sī chāi-tī sún-sit,
m̄-sī chāi-tī só͘-tit;
M̄-sī chāi-tī lim jōa-chōe chiú,
sī chāi-tī chhut jōa-chōe chiú;
In-ūi thiàⁿ ê pún-lêng,
chāi tī thiàⁿ ê hi-seng;
Chia̍h-khó͘ siōng-chōe,
hù-chhut kòng-hiàn iā sī siōng-chōe.

附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com