《台语荒漠甘泉（全罗版）》

 | | | 转寄

"Hó ê kiat-bé"

作者 陈清俊 翻译 2009.10.04

listen


Cha̍p ge̍h chhoe-sì (Cha̍p ge̍h sì ji̍t)

"Án-ni Iâ-hô-hoa sù-hok Iok-pek ê bé-kéng iâⁿ-kè i ê khí-thâu." (Iok-pek-kì 42:12)

Iok-pek tùi i siū khó͘-lān tit-tio̍h hok-hūn. I siū khó-giām lâi chèng-bêng i chòe lâng oân-choân. Siâng-khoán, góa siū ê khùn-lân sī beh kian-kiông góa ê phín-keh, hō͘ góa tit-tio̍h chêng só͘ bô ê un-sù, châi-lêng. In-ūi siōng se̍k ê ké-chí sī siⁿ tī siōng chho͘-piak-piak ê chhiûⁿ-ûi téng. Pit-su ài keng-le̍k kè khiam-pi, lâu ba̍k-sái, sí-bông, chiah ōe tit-tio̍h êng-iāu. Chhin-chhiūⁿ Iok-pek ê khó͘-lān hō͘ i tùi Siōng-tè chìn chi̍t-pō͘ ê jīm-bat. Hō͘ ka-kī koh-khah khiam-pi. Chòe-āu i chiah ōe án-ni tōa-siaⁿ kóng, "Taⁿ góa ê ba̍k-chiu khòaⁿ-kìⁿ Lí." (Iok-pek-kì 42:5)

Ká-sú thong-kè thòng-khó͘ sún-sit góa thang kàu chong-giâm Siōng-tè ê bīn-chêng, phak-pài tī I ê bīn-chêng kî-tó kóng, "goān lí ê chí-ì tit chiâⁿ" (Má-thài 6:10) án-ni góa só͘ tit-tio̍h ê sī hô-téng ê tōa ah. Siōng-tè hō͘ Iok-pek khòaⁿ tio̍h i bī-lâi ê êng-hôa, in-ūi tī hiah ê khó͘-lān khùn-khó͘ ê ji̍t-chí, Siōng-tè hō͘ i jīm-bat tio̍h Siōng-tè ê ò-pì, chiah ōe sêng-khún kóng, "In-ūi góa chai kiù-sio̍k góa ê sī oa̍h-ê." (Iok-pek-kì 19:25) Só͘-í "Iâ-hô-hoa sù-hok Iok-pek ê bé-kéng iâⁿ-kè i ê khí-thâu." --- tùi "be̍k-sióng"

Khùn-lân bōe lâi kìⁿ lâng, tû-hui i ê chhiú tiong tòa chi̍t tiâu kim-tiâu.

Piáu-bīn ê ge̍k-kéng tùi chèng-ti̍t ê lâng sī iú-lī ê, chí-iàu goān-ì kè-sio̍k ho̍k-sāi, nāi-sim tán-thāi. Hôe-sióng kè-khì ū sêng-chiū ê lâng, in lóng ū kian-tēng ê sìn-sim, hó-táⁿ hiòng-chêng bô kiaⁿ khùn-lân! Lán nā bô goān-ì chiap-siū koh jím-siū khùn-lân, chin-chōe hok-hūn tit bōe tio̍h. Ū-ê hí-lo̍k sī thong-kè iu-siong chiah ū ê. Ū-sî Siōng-tè chin-lí ê khé-sī sī tī tē-chiūⁿ ê kng sit khì āu chiah sán-seng. Siu-sêng sī tī ū keng-chok chèng-choh ê āu-bīn.

Iú-sú í-lâi, siōng kian-kiông ê lâng sī tùi khó͘-lān lâi sán-seng. Siōng úi-tāi ê jîn-bu̍t sin chiūⁿ lóng tòa khó͘-thàng ê siong-jiah. Chheng-nî pah-sè í-lâi ê sûn-tō-chiá, chhēng êng-kng ê phàu, téng-bīn ū kim-sih-sih ê kng-khoân, sī thong-kè in ê ba̍k-sái kap siū-siong tiong khòaⁿ tio̍h thian-kok ê tōa-mn̂g. --- Chapin

Tùi só͘ phōa ê kim-liān, chai lí thiàⁿ ê cheng-liān,
Tùi thiàⁿ-sim ê piáu-hiān, chai lí keng-kè hé ê chhì-liān,
Chin-si̍t sim ah, kè-sio̍k chìn-tián, kng-sih-sih ióng ê kim-liān,
Ū chēng-hòa hé ê un-tián, kap khó͘-lān lô͘ ê thoàn-liān. --- Adelaide Proctor


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com