《台语荒漠甘泉（全罗版）》

 | | | 转寄

"Siōng-tè ê sî-kan"

作者 陈清俊 翻译 2009.03.22

listen

Saⁿ ge̍h jī-jī (Saⁿ ge̍h jī-cha̍p-jī ji̍t)

"Kè sì-cha̍p nî, tī Se-nái soaⁿ ê khòng-iá, chhì-phè hé-iām ê tiong-kan, ū thiⁿ-sài tùi i hián-hiān. ... Chú kā i kóng, lí só͘ khiā ê ūi sī sèng-tōe. Góa ê peh-sìⁿ tī Ai-ki̍p, góa si̍t-chāi khòaⁿ-kìⁿ in ê khùn-khó͘, ia̍h thiaⁿ-kìⁿ in ê thó͘-khùi, chiū kàng-lîm lâi kiù in; taⁿ lí lâi, góa beh chhe lí khì Ai-ki̍p." (Sù-tô͘ hēng-toān 7:30,33-34)

Ēng sì-cha̍p nî lâi chún-pī chi̍t ê tōa sù-bēng, sī sǹg chin-tn̂g ê sî-kan. Siōng-tè ê iân-chhiân, pēng m̄ sī bô teh chhái-chhú hêng-tōng. I chún-pī chip-hêng jīm-bū ê lâng, iā hō͘ le̍k-liōng sêng-se̍k. Jiân-āu sî-kan chi̍t ē kàu, lán chiū ài ióng-kám khiā chhut-lâi, chip-hêng só͘ kau-thok ê jīm-bū. Liân Ná-sat-le̍k lâng Iâ-so͘ iā ún-ba̍t saⁿ-cha̍p nî, hō͘ I ū kàu-gia̍h ê tì-hūi chiah khai-sí I ê sū-kang. – John Henry Jowett

Thiⁿ-pē bô kóaⁿ-kín chòe. I ēng chin-chōe nî ê sî-kan chún-pī hiah ê I beh tōa-tōa sú-iōng ê lâng. M̄ bat siūⁿ kóng chún-pī ê sî-kan siuⁿ tn̂g, siuⁿ bô-liâu.

Siū-khó͘ tiong siōng khùn-lân ê chiū-sī sî-kan ê būn-tê. Té-té ê thòng-khó͘ iông-ī jím-siū, iông-ī jím-nāi chiū kè-khì. Chóng-sī pi-siong nā-sī chi̍t nî koh chi̍t nî thoa lo̍h-khì, tîm-tāng ê thòng-khó͘ chi̍t kang kè chi̍t kang bô-bāng kè-sio̍k lo̍h-khì, sim-lêng beh sit-khì le̍k-liōng. Nā bô Siōng-tè ê un-tián, it-tēng beh tîm lo̍h tī choa̍t-bāng thòng-khó͘ tiong.

Iok-sek keng-kè kú-tn̂g ê khó-giām, Thiⁿ-pē iā beh chiong chit chióng ê kà-sī tn̂g-tn̂g chhim-chhim ìn tī lán ê sim-lāi. "I beh chē-teh, chhin-chhiūⁿ thoàn-liān gûn hō͘ i chheng-khì-ê." (Má-la̍h-ki 3:3) I chai chheng-khì thoàn-liān só͘ su-iàu ê sî-kan jōa kú. Thiⁿ-pē chhin-chhiūⁿ chi̍t ê kim-chhiūⁿ, tī jia̍t-jia̍t hé lāi ê kim iûⁿ kàu khòaⁿ tio̍h ka-kī ê hêng-siōng, chiah beh chiong hé thêng-chí.

Kin-á-ji̍t, lán khó-lêng bô khòaⁿ-tio̍h Thiⁿ-pē chiong lán "khǹg tī I ê chhiú ê tì-ìm ē" (Í-sài-a 49:2), só͘ bí-hó ê kè-ōe ê chòe-āu kiat-kó. Khó-lêng beh am-khàm chin-kú, sī beh hō͘ lán ê sìn-sim kiàn-li̍p tī Thiⁿ-pē pó-chō ê pó-chèng ē. In-ūi I ê pó-chèng, lán thang an-jiân thèng-hāu hit ji̍t ê lâi-lîm, ū thiⁿ ê hoaⁿ-hí kóng, "Bān hāng sū saⁿ-kap lâi hō͘ thiàⁿ Siōng-tè ê lâng tit-tio̍h lī-ek." (Lô-má 8:28)

Chhin-chhiūⁿ Iok-sek, lán eng-kai koh-khah kín-sīn khòaⁿ-tiōng tī che khó͘-lān ha̍k-hāu só͘ o̍h ê kong-khò, m̄-sī chù-ba̍k tī tit-kiù ê sî-kan téng. Múi ê kong-khò lóng ū goân-in, lán nā chún-pī hó, chín-kiù chiū beh kàu lah. Chóng-sī lán ài liáu-kái, lán nā bô tāi-seng o̍h chiah ê khó͘-lān ê kong-khò, chiū put-phòe tam-jīm khah koâiⁿ ê chit-bū. Thiⁿ-pē sī ūi-tio̍h lán chiong-lâi ê sū-hōng, kap khah-chōe ê chiok-hok lâi teh kàu-io̍k lán. Nā-sī lán í-keng ū chu-keh chē tī pó-chō, sî-kan chi̍t ē kàu, jīm-hô ê sū-bu̍t lóng chó͘-chí bôe tiâu.

M̄ thang tùi Siōng-tè chhiúⁿ sî-kan, chhiúⁿ bîn-á-chài, hō͘ I ū sî-kan tùi lí kóng-ōe, tùi lí hián-bêng I ê chí-ì. I bōe iân-chhiân, lí ài ha̍k-si̍p thèng-hāu.

I bōe siuⁿ bān, sím-mi̍h sî siōng hó, I tin-sioh,
Bô tit kiaⁿ, tán I lâi, chēng-sim an-hioh.

Éng-oán m̄ thang tio̍h-kip, cháu tī Siōng-tè ê thâu-chêng. Ha̍k-si̍p tán-thāi I só͘ tēng ê sî-kan, bió-chiam, hun-chiam, sî-chiam lóng beh chí-hiòng chiah ê hêng-tōng ê khak-si̍t sî-chūn.


附注:《荒漠甘泉》汉罗版kap "Hong-bô͘ Kam-chôaⁿ"全罗版附CD，由人光出版社出版， 欢迎洽购(06-235-6277分机(122~124) ， e-mail:book@pctpress.com