注意顶面 ê 经节有一字细细，无注意 tio̍h ê 字 “tī”！有真 chōe 例，上帝无 ài hō͘ 伊 ê 圣徒 tú-tio̍h 火，火会 kā 人烧伤，烧疼。总是咱 “tī”ta̍k 样苦难中也 beh 荣耀主。
Tùi chit 种 ê 道理，咱 tī 火焰中，也 tio̍h 荣光伊。伊容允试炼临到咱，hō͘ 咱 beh 经历 tio̍h 完完全全 ê 信心，相信伊 ê 好意 kap 真实 ê 疼痛。Tùi 火中经过以后，咱 tùi 各种事会 koh-khah o-ló 主。
Tùi 火中经过，是需要真大 ê 信心，若是小信 ê 人会失败。咱的确 tio̍h tī 火中得胜利。――Margaret Bottome
信心是 tī 一个人 tú-tio̍h 困难 ê 时 chiah 会显露出来，受人 hiat tī 火中 ê Sa-tek-la̍h，Bí-soah，A-pek-nî-ko，chit 三人当离开火 ê 时，lóng 无改变，kap 原来同款，只是捆缚 in ê 锁无去 nā-tiāⁿ。父上帝 tī 咱 ê 苦痛 ê 试炼火炉中，也会解除咱 ê 锁链。
Chit 三人 tùi 烈火中经过，lóng 无受伤，身上连起疱也无。火无力 thang 伤 in ê 身躯，头毛也无臭 ta，衫也无变色，lóng 无一点 á 臭火 ta 味。(但以理 3:27)
一个基督徒应该án-ni行出火 ê 试炼炉――锁链解除，身体无受火炎伤害。
「Tùi 内面来大大 khah 赢伊」(歌罗西 2:15)
真正 ê 胜利就是，tī 破病中赢过破病；tī beh 死 ê 时超越死亡；tī 逆境中克服逆境。相信我，确实有一个力量，tī 冲突中 hō͘ 咱会 khah 扬。
当咱达到 tī 高 ê 所在，回头看咱所行 ê 路，咱 beh 唱胜利 ê 歌。当咱散赤 ê 时，会 hō͘ 人富裕，人也 beh 看咱是富足，咱已经 tī 散赤中 khah 赢散赤。
基督 tī 伊 ê 受侮辱中，忍耐得胜，咱也 beh tī 受人侮辱中，忍耐得胜利。―― Margaret Bottome
看 tio̍h 一个受考验，受重担，心犹原是快乐 ê 人，咱 kiám bōe 欣羡伊？看 tio̍h 受引诱，无失迷来得胜 ê 人，咱 kiám 无感染伊 ê 英雄气慨？看 tio̍h 一个 kap 你同行，身体衰 lám，精神坚强 ê 人，你 ê 心 kiám 无感动，kap 伊 saⁿ-kap 光荣？
|
|
|
转寄
