《赖永祥讲书》

 | | | 转寄

台湾基督教史ê宝库

作者 王昭文 2016.03.27


八月间有去一chōa美国，拜访tòa tī波士顿ê赖永祥教授。今年(2012年)九月满90岁ê赖教授，照常每工殷勤工作，整理多年来收集ê资料，不断充实「赖永祥长老史料库」（www.laijohn.com）。Chit-ê网站，是公认ê台湾研究重要明灯，台湾基督教史宝库，每工lóng有真chē人tī chia挖宝、chhōe根。

赖永祥教授名气siōng响ê领域是tī图书馆学，伊参与创办台湾大学图书馆学系、独力研发广受采用ê「中国图书分类法」，ē-sái讲是台湾图书馆界祖师级ê人物；m̄-koh，伊个人兴趣其实是tī历史研究。伊是台湾战后第一批投入台湾史研究ê学者、17世纪台湾史研究ê开拓者，着有《台湾史研究初集》，koh纂修《台湾省通志稿卷三：政事志外事篇》。伊是到taⁿ siōng长寿ê台湾研究刊物《台湾风物》ê创办者之一，mā是siōng早20年ê重要作者。

Án-ne，一位广博、顶真ê学者，tī 65岁了后，渐渐kā工作重心放到tī台湾基督教史上。伊自少年ê时期kah老母同齐受洗，对信仰追求非常认真，前后担任台北和平教会、波士顿台湾人基督教会ê长老。Tī 1965年to̍h编辑整理〈基督教台湾宣教史文献〉，收入《台湾基督长老教会百年史》做为附录。赴美后，伊继续收集基督教文献资料，并发行「壹叶通讯」来kah诸亲友分享重要史料、同时徵集相关资料。后来tī台湾教会公报社总编辑卢俊义牧师ê邀请下，1988年起开始tī《教会公报》连载「教会史话」专栏，每期约1000字左右。「教会史话」连载了674则，出版5辑。赖长老宣称其健康状况不佳，一定tio̍h暂停写作。无jōa久，「好学不倦」ê赖长老，开始学习使用电脑，并且jú来jú有心得。2007年1月，tī林皙阳牧师娘李秀卿女士ê协助下，成立「赖永祥长老史料库」。除徵得台湾教会公报社同意，kā《教会史话》修订、电子化、上网，赖长老koh kā所收藏ê史料kā它解题，渐渐khǹg起lih chit-ê网站。

真chē私人资料愿意提供hō͘伊，是因为信任伊ê人格kah处事能力，伊所建立ê公信力，oh得有人ē-tàng取代。不过，赖永祥长老珍贵ê所在并m̄-nā tī伊长年用心收集ê资料，koh khah tī伊做历史研究ê细腻用心kah整理史料ê方法。伊kā零碎ê资料做有意义ê连结、分类，展现出无人ē-tàng取代ê学术能力。M̄-koh伊无kā chiah-ê物件当做私产，反tńg建构史料库，hō͘ koh khah chē人thang使用。Chit-ê史料库，khah se5ng一个用心设计ê图书馆，tùi一般读者、chhōe入门途径ê学徒到专业研究者，lóng thang tùi chiah-ê整理kah真好用ê资料中，得tio̍h thang用ê资讯，甚至chhōe-tio̍h前往下一阶段ê跳板。 赖长老讲伊做chiah-ê是出tī个人兴趣。M̄-koh，伊ē-tàng久长继续，不管有无掌声lóng m̄-bat厌倦，而且对资料一屑á都无藏私来分享，tī以历史为兴趣者身上并真罕得。我想，若m̄是出tī信仰热情，若m̄是出tī对教会ê使命感，án怎有可能？

赞叹赖永祥长老ê工作之余，mā难免为tio̍h台湾基督长老教会头尾iáu未建立「台湾基督教史料中心」而感遗憾。历史档案资料馆筹备数年，一直iáu未进入具体规划。期望tī 2015年基督新教来台150年周年记念ê时，ē-tàng看tio̍h一线光明。赖长老做好模范，bē-tàng无有传承继续ê人。

*王昭文撰 《台湾教会公报》3169期 2012年11月25日 窗口无遮栏 ; koh见tī王昭文茄苳树窠网站 2012年11月28日。附图像 赖永祥长老tī厝内ê工作空间 (王昭文2012年8月撮影)