《赖永祥讲书》

 | | | 转寄

《教会史话》(2_134) 二老口旧楼

作者 赖永祥 2010.01.31

1868年11月25，马雅各医生ùi打狗出海路去安平，经kòe 2礼拜走chhōe后，tī府成内二老口chhōe tio̍h一间大厝，做传教ê基地；chit间厝一直hō͘教士会使用kàu 1900年chiah hâiⁿ hō͘厝主。Tī后来óa东门起ē新楼，一般叫chit间厝是旧楼。

Chit间大厝tī二老口街府东pêng ê巷á尾，西pêng óa后来ê英国领事馆，koh隔壁tio̍h是台湾府署。厝是旧型ê kē厝á，有三进。第一进做医馆、药房、外科房、病房，第二进有礼拜堂，后进有ē-kha手人ê房间、客房、仓库等等。Ùi自正门入..来ê正pêng有2间房间，是马医生翁á某ê khiā-ke，马医生转去liáu后换甘为霖牧师tòa。Tò-pêng有2间房间，siōng头起先是吴文水、高长tòa，后来由接替马医生ê德马太医生（Dr. Matthew Dick-son，1871年来台）tòa。城内有大青á、槟榔树á kha有柚á-châng，有花园，有一口深井（ē-sái提供品质真hó͘ ê水）。

根据马医生tī 1902年hō͘巴克礼ê批，知影chit间厝ùi「金继成」（Kim Ke-seng），tio̍h是？生许建勋（素为英商怡记行伙）设ê行。一般lóng叫做「许厝」。Chit间厝后来是许廷光tòa..ē。许廷光，1861年生，号凌槎；祖宜章，号纯德，秀才；父朝华，字逊荣，号茂堂，恩贡生，候补同知；嗣父庆清，恩贡生，候补知县；廷光tī三世文学之家ê所在出世，真少年tio̍h真khiáu。光绪癸未1883年）科秀才，乙酉（1885年）科增生，癸已（1887年）科补廪生。乙未（1895年）日本军人来台湾，伊kap蔡梦熊、杨鹏搏、陈修五等代表市民，偕巴克礼宋忠坚去见日本将军乃木希典，请伊入..来。Tī日本人ê统治下，做台湾总督府评议会员等ê要职，权力kap钱财lóng有，m̄-koh老..来真落魄。产业落tī日本营造厂「汤川组」（组头汤川鹿造）。根据黄茂卿tī台南市政事务所查ē（见太平境……教会设教九十年史）（565-567页），hit-ê地号是台南市寿段一小段六番地，面积lóng总是四分九区七毛（约1400坪），是chit-má省立台南启聪学校博爱堂kap隔壁sio接ê宿舍（卫民街26、28、30号）kap头前ê卫民街路。

新楼ê名，是ùi 1874年（同治3年），甘为霖牧师kap德马太医生tī城内弥陀寺后永康里西竹围ê所在，买..ê（永远租给约）一ê花园，大概三丘，koh tī 1876年起khiā-ke。后来m̄-nā厝，连hit tah，甚至tī新买ê土地附近（1886年契约、1897年才买好）新起医馆，mā号做「新楼医院」。1900年医馆ùi旧馆sóa kàu新馆。

《台湾教会公报》 2028期 主后1991年1月13