《赖永祥讲书》

 | | | 转寄

《教会史话》(2_130)「高长伯」传探原

作者 赖永祥 2010.01.03

高长，通常hō͘人叫做高长伯，是长老教会tī台湾ê第一ê果子，mā是第一位本地出身ê传道者。真可惜kàu chit-má ia̍h-bōe有详细ê资料刊..出来。伊在生相关ê消息，一般人知影ē可能lóng ùi杨士养牧师写ē《台湾信仰名人略传》第一册（1966年刊），ia̍h是杨士养编写林信坚修订《信仰伟人列传》（1989年刊）。

杨士养牧师所写信仰ē名人，材料丰富，记ē「不特为死者作纪念碑，更可为后人考资之镜」（录自「前言」），kan-tāⁿ差tī伊通常无注明资料ē来源。「高长伯」一文（tī《略传》第一册16-19页），其实是高金声牧师用白话字写ē中文翻译。高金声牧师写ē「高长伯」是南部教会历史部所写「追念圣徒」ê其中一ê，收tī《南台教会史》（杨士养着）成做附录。既然是翻译，góa tio̍h kā两ê对照，发现chi̍t-koah问题。举例来讲：高文原记「高长伯是福建省泉州府（Choan-Chiuhu）晋江县永宁城的人」，m̄-koh杨文做漳州府，笔误。高文koh记Li Hui兄受长伯ê诚实感动来入信事，杨文tio̍h写作李辉兄，m̄-koh查考文前、李文后ê系谱，应是李惠……。

林信坚牧师修订ê《信仰伟人列传》（请见第17-23页），竟然kā杨士养所写ê「高长伯」，mā就是高金声所写「高长伯」ê中文译，全部thâi掉；用1912年11月出刊《台南教会报》（第332号）无注明作者ê「高先生的小传」译文来代替，koh附林信坚写tī 1985年3月31《台湾教会公报》（第1726期）ê古文新注做附录。林君并无讲清楚拿掉原本作者ê全文。 高侯青莲长老（1879-1975年），是高再得长老娘，有岁ê时阵leh做编写in ta-koaⁿ高长传教士传记，运用听tio̍h、看tio̍h、调查资料kap思考，koh有林宇（长老教女学第一届校友）ê帮助，用白话字完成。遗族kám有意思beh发行？

有关高长在生资料ê找chhōe，góa感觉黄茂卿长老ê努力真值tit提出来讲。伊tī《台湾基督长老教会太平境马雅各纪念教会设教一二O年史》（1985年刊）早期史料内，koh tī《……（同）九十年史》（1988年刊）内，形容高长是台湾宣教ê「火战车」，真kut力leh调查。Tī《……九十年史》，koh有高聪明医师（高金声牧师五男）提供真chē高家收藏ê相片，真珍贵。

有关高长在生，中外资料koh需要找chhōe（譬如讲《台南教士会议事录》），伊ê系谱需要编做（kan-tā想看mài算传道者、教会长执、社会领袖有jōa-chē？）真期待有chi̍t工ē-tàng完成。

《台湾教会公报》 2023期 主后1990年12月初9