《《一位台湾女信徒ê自述》》

 | | | 转寄

第三章_19）Τī头城共同开设综合病院

作者 吴月娥, 台译：Lîm Chùn-io̍k 2021.04.11

1959年，kah往常仝款，许嘉代、钟啓芳、林再万kah陈朝章chit四位好朋友医生聚集做伙。Hit时，有人提议四人来共同开设一间大型病院，对头城镇做出大贡献。四人lóng感觉有兴趣，就继续推进chit’ê构想，而且终其尾有kā它实现。病院ê场所是设tī头城初中附近ê郊区，四人合资购买土地，了后起造一间现代化ê大病院；院长是由阮翁许嘉代担任。开幕hit工，有来自宜兰县各地ê医生kah首长来参加庆典，盛况空前。Chit间病院有设X光室、手术室kah检查室，tī田庄来讲，是一间设备齐全ê病院。四个医生kā kakī ê诊所关起来，lóng来病院诊疗病人。M̄koh，过无gōa久，in tútio̍h一个想bē到ê问题，to̍h是因为指定beb看某某医生ê患者人数增加，致使有ê医生tùi早到晚lóng真无闲，有ê却kui工lóng无tāichì做。四人之间当然开始有bē爽快ê气氛，结局tī两年后病院to̍h解散，四人koh tńg去kakī ê诊所；理想kah现实beh并行是行bē通ê。