《《一位台湾女信徒ê自述》》

 | | | 转寄

第三章_15）鸿玉tī儿童音乐比赛得tio̍h头名

作者 吴月娥, 台译：Lîm Chùn-io̍k 2021.03.21

鸿玉tī钢琴方面ê进步真明显，来阮tau看阮ê阿叔吴天赐对她真oló；伊tī淡水中学时代to̍h学过钢琴，所以，伊mā真gâu弹钢琴。伊kā我绍介tī台北神学院教册ê美国教授毛克礼教授ê夫人；她tùi音乐大学毕业，以了解巴哈（Bach）ê作品来得tio̍h真koân ê名声。她kā鸿玉收做她ê学生，鸿玉hit时是小学四年。因为钢琴课是ta̍k礼拜六ê下晡一点开始，m̄koh去到台北ê特快车需要两点钟ê车程，结局，鸿玉不得不ta̍k礼拜六lóngtio̍h缺席，无去国民学校上课。

大约tī hit段时间，报纸顶面有刊登一篇文章，标题是「Beh举行台湾首届儿童音乐比赛」，对象是钢琴kah小提琴，钢琴有指定曲kah自选曲。我随时为鸿玉提出报名申请表，m̄koh，因为当时鸿玉ê指导老师是郑信美小姐，所以阮对毛克礼夫人保守chit’ê秘密。总是，因为比赛日渐渐接近，阮to̍h kā毛克礼夫人表明鸿玉beh参加音乐比赛ê tāichì，结果，她无表现出无欢喜ê表情，颠倒对鸿玉做种种ê指导。

比赛tī台北市中山堂举行；参加者tùi台湾全岛聚集óa来，kahná大多数是国民学校五到六年级ê女生。阮家族六人前一工to̍h来到台北，tòa tī北投ê一间旅馆。为tio̍h hit工ê比赛，我编织一条海军蓝ê背心裙hō͘ 鸿玉穿，配一领白色ê长ńg衫。鸿玉真可爱，阿姊兰玉mā是仝款ê穿插，两人看起来kahná是双生á。鸿玉端庄大方，弹琴koh kahná流水hiah顺sī，无失误ê所在，所以观众喝采ê掌声特别大声。

结果，鸿玉得tio̍h头名。隔tńg工ê新闻顶面有一张大相片，她手里the̍h优胜ê旗á。