《《一位台湾女信徒ê自述》》

 | | | 转寄

第一章_2）小学生时代ê我kah日语演讲比赛ê回忆

作者 吴月娥, 台译：Lîm Chùn-io̍k 2020.03.29

Tī我四岁hit年ê四月，我入学，去读头围公学校。开学ê前一工暗时，我kā阿母替我做ê新衫裤khǹg tī枕头边，koh kā买hō͘ 我ê白色新运动鞋mo͘h-leh困。Hit时ê生活真正是真质素，真少人有鞋thang穿，大人kah gín-á lóng thǹg赤脚。我mā是kan-taⁿ tī开学hit工chiah穿鞋，tùi第二工起to̍h thǹg赤脚去学校。我一直kā鞋顾kah真好势，kan-taⁿ tī节日kah游览ê时chiah ē穿鞋。

阮hit班总共有40名，男生25名，女生15名，老师是一位tùi台北第三高等女学校毕业ê少年cha-bó͘ 老师；校长是日本人加藤先生。女生tùi四年级开始to̍h有裁缝ê时间，教阮án怎制作简单ê衫裤、刺绣kah编织品。因为公学校ê裁缝教育，阮老母chiah ē-tàng制作家庭服装。春季ê公学校运动会是田庄ê一个大活动，运动埕周围四界lóng是村民，对各种运动比赛kah跳舞表演，掌声一直无停。Tī旧历新年，学校koh有举行游艺会，两个月前to̍h选出siōng优秀ê学生来表演戏剧，我mā被选做主角。

六年级ê时，有一个宜兰郡举办ê日语演讲比赛，男生代表是班里第一名ê简阿财，女生是选我做代表。Tùi比赛ê一个月前，阮to̍h开始下课后ê特别培训，由稻田老师指导。阮去老师ê宿舍，hō͘ 老师纠正tī台顶ê讲话方式、姿势kah语气声调。阮m̄知演讲ê主题是啥物，因为题目是临时决定ê，m̄-koh老师有hō͘ 阮各种各样ê题目，来kā阮训练。 稻田先生是一年前tùi东京来就任ê老师，伊新婚ê牵手是一个细枝骨koh白phau-phau ê美人，特别培训ê时，她一定ē请阮食羊羹（ようかん）。

Chit-ê演讲比赛关系tio̍h学校ê名誉，致使老师比学生koh khah关心。校长kah稻田先生为tio̍h beh试看阮ê胆量，所以两pái tī早起ê聚会中，叫阮tī全校学生ê面前讲话。校长非常满意，因为两pái lóng真好势。

Tī宜兰男生公学校举行演讲比赛ê日子终其尾到à。我身穿老母做ê有十六个kéng ê乌百kéng裙kah白色运动服，kah稻田老师、校长阮四人，做伙坐早起七点发ê火车去宜兰。Tī男校大礼堂，八点半开始抽签决定顺序kah题目。我排第三名，题目是「礼拜日」。我到taⁿ iáu m̄-bat练习过「礼拜日」chit-ê题目，所以，忽然感觉操心kah不安，kah-ná ka-kī kui个身躯漂浮tī空中。头一个，第二个了后，叫「第三号」ê时，我赶紧khiā起lih讲台顶，开始演讲。

「我ê题目是礼拜日。礼拜日是我siōng kah意ê一工，tùi拜一到拜六我一定tio̍h去学校读册，第七工是礼拜日，学校歇困。礼拜日m̄-nā学校关门，银行mā无服务。礼拜日，我mā ē chhōa小弟kah小妹做伙去sńg。阮是基督教徒家庭，礼拜日我ē去参加主日学。To̍h是án-ne，到chia为止。」

演讲真短koh无啥物内容，我心内充满非常gāi-gio̍h ê感觉。Tī回程ê火车顶，老师恬恬无讲话，阮彼此lóng感觉真gāi-gio̍h。对我来讲，chit-ê演讲比赛并m̄是一个美好ê回忆，m̄-koh因为某种原因，hit当时ê情景犹原tī我ê眼中teh发烧。Hit时我chiah 12岁。