《《一位台湾女信徒ê自述》》

 | | | 转寄

第一章 我ê背景kah少女时代_ 1）父母

作者 吴月娥, 台译：Lîm Chùn-io̍k 2020.03.22

1）父母 我是1921年十一月出世ê台湾人。当时ê台湾是日本ê殖民地。日清战争中，中国清朝被日本phah败，而且根据tī下关（しものせき）签署ê和平条约（即《马关条约》），台湾开始受日本统治。

我ê本籍地是台湾宜兰郡头围庄，背山向海，人口约一万人，是一个农业兼渔业ê乡村。阮阿妈生十个kiáⁿ，八个cha-po͘ kah两个cha-bó͘；阮老父吴来发是大kiáⁿ，18岁ê时kah大伊一岁ê cha-bó͘人结婚，to̍h是阮老母林阿换。

阮老母八岁ê时，她ê老母往生；隔tńg年她ê老父koh娶，后母ài她做家事ê差用，致使阮老母soah无法度去学校读册。所以，tī她嫁hō͘ 阮老父一个月后，她chiah koh再进入公学校ê六年级。1895年日本占领台湾了后，tī各地建立公学校，等于是日本ê小学。真chē日本人tòa ê所在chiah有日本小学，to̍h是hō͘ 日本政府官员、警察、学校教师kah seng-lí人ê子弟读ê小学。台湾人读ê公学校是hō͘ 七岁以上ê gín-á入学，读完六年毕业。

结婚后无gōa久，阮老母有娠ā。Tùi我tī阮老母ê腹肚开始，我to̍h一直teh读册，所以我hō͘ 人笑讲：「你应该比任何人koh khah聪明。」

阮老母是一个文雅端庄koh贤明ê好主妇，她是宜兰郡出名总铺师ê cha-bó͘ kiáⁿ，所以她m̄-nā真gâu煮食，而且tī裁缝方面mā真熟练。阮老母为阮kui个家庭制作所有ê衫裤，包括老父ê九个兄弟姊妹kah祖父母。好字运ê是，阮老母有一台阿公tùi美国进口ê裁缝车á，她暝日无停teh踏ê情景，我到taⁿ iáu ē记得。

阮老父tùi头围庄公学校毕业，而且kah阿公tī头围庄停车场前开设一间运送店。日本占领台湾以后无gōa久，tī台湾建立一条南北纵贯铁路，而且tī 1908年开通基隆到高雄。无gōa久了后，宜兰线，to̍h是台北到苏澳线mā开通。因为头围庄是农产品kah鱼类ê产地，所以chit条铁路成做商业不可缺ê交通线。头围庄有两间互相竞争ê运送店，阮老父ta̍k早起，天iáu未光to̍h醒起来，骑自转车去离街á真远ê作穑人á是渔民ê厝，去bāu运送ê khang-khòe。阮老母kā我讲，阮老父非常认真koh负责任。阮tau m̄是富裕，mā m̄是sàn-chhiah，ē-sái讲是中等ê家庭。我是长男ê长女，tī父母、祖父母kah老父五个小弟ê疼之下长大。