《《一位台湾女信徒ê自述》》

 | | | 转寄

第一章 12）卢沟桥事件发生

作者 吴月娥, 台译：Lîm Chùn-io̍k 2020.06.07

1938年，tī中国大陆ê卢沟桥事件爆发了后，日本ê侵略战争湠开到kui个中国。「替天行道，打击不义；我是忠勇无比ê战士；欢呼ê声teh送别；chit-má khiā tī父母ê祖国；无战赢无beh tńg来，勇气ê心来chiù-chōa」；学生头壳顶pa̍k布条，身穿运动服，手gia̍h国旗，沿路唱chit首军歌，沿路穿过淡水街á teh游行。回想起来，日本ê野心实在真可恨。Hit当时，虽然我对日本统治台湾并无任何怨叹，m̄-koh，我讨厌in siàu想别人土地ê野心。总是，tī 1895年日本军队进驻台湾了后，真chē文化kah建筑，亲像公学校、中学校、大学、病院、南北纵贯铁路、总督府、博物馆、动物园等等，无人ē-tàng否认hia-ê lóng是日本人ê手起造ê。

阮gín-á人唯一接触ê日本人kan-taⁿ是学校ê老师；我认bat ê日本人老师lóng是温柔koh有疼心ê老师。有坂校长尽全力teh重建淡水中学，因为淡中kah淡女chìn前是由外国人经营，因为án-ne，soah无法度得tio̍h日本学校ê毕业资格，所以学生毕业了后beh升学，一定tio̍h先转学到政府认可ê学校，koh再读一年去the̍h tio̍h毕业证书，了后chiah ē-tàng参加升学考试。M̄-koh，tùi淡水中学毕业beh转学去台湾ê公立中学是无可能ê，所以，淡水中学ê毕业生tio̍h先转入东京ê私立中学，tī hia得tio̍h毕业证书了后，chiah ē-tàng继续读大学。有坂校长鼓励老师专心斟酌来提高学生ê学业能力，一年后，beh向教育部申请淡水中学kah淡水女学院ê升级考试。我tī三年级ê第一学期尾，chit项考试开始实施。Tùi一年级到四年级，ta̍k个年级所有课程ê考试题由台北第三高等女学校ê老师出题，监考老师mā是第三高女ê老师。