《胡文池牧师kap布农族》

 | | | 转寄

平地教会牧会有感

作者 胡文池 2009.05.24

摩西bat命令以色列人民ê后代，每年tio̍h遵守住棚节(申命记十六：13)，就是七日tòa守tī简陋ê草棚屋，来记念古时in ê祖先tī出埃及时所经过ê苦难。

上帝mā tī差派我到贫苦落了后ê山地传福音chìn前，先hō͘我体验tio̍h种种苦难，以操练我ê身心。 中国贤人bat讲：「天将降大任tī斯人也，必先苦其心志，劳其筋骨，饿其体肤，空乏其身．行拂乱其所为；所以动心忍性，增益其所不能。」

传福音hō͘「万民」是每一位基督徒对主所受ê大责任。对「高山族」传福音就是我所受ê大任。主耶稣bat tī旷野受磨练四十工，保罗也bat tī亚拉伯旷野一段时间准备身心(加拉太册一：18)，á我，煞tī平地四所教会受操练十二年，chiah前往山地工作。

一、信徒增加多捷径
我tī平地教会工作十二年，虽然所获ê果子无chē，但是我家己所得tio̍h ê子女总共有八个。In lóng是热心ê基督徒。我有二个男孩，长子khiā起tī美国，是大学教授，tī教会执事。上细汉kiáⁿ tī台湾服务tī教会机构。六个kiáⁿ婿中，大kiáⁿ婿是牧师，其他五位lóng是教会长老，cha-bó͘-kiáⁿ tī教会中mā lóng有重要ê服事，孙儿们mā lóng不偏离主道，年长ê渐渐参与学习服事。这ē-sái讲是上帝boeh补足我tī平地教会工作ê不足。

二十五年前，我tī美国留学时，时常美国人问我：「你有几个gín-á?」我就答讲：「有八个」。In lóng大惊小怪ê讲：「hiah-ni̍h chē ah!」因为in lóng是生一、两个gín-á就避孕。我讲：「tī异邦里，传福音得人是非常无容易ê事，不如家己生iáu卡紧。你看，我生了八个，in长大以了后结婚就变成十六个，koh过三十年，in ê子女照án-ne生育就变成一大群了。Chit种几何级数ê增多，实在是惊人ê数目ah!你讲是m̄是?你一生中，thang由传道得tio̍h chiah-ni̍h-chē人信主mah?」in lóng讲：「嗯，讲得一点mā无m̄-tio̍h。」讲完了，大家lóng哈哈大笑。

反观台湾教会近年来不增长，原因虽然真chē，但lóng ē-sái讲是教会全体ê责任。由非基督徒入信ê暂时无算，单靠会友ê自然生产率，会友mā会增多chiah是，可惜多数不冷不热ê会友，或挂名ê基督徒，m̄-nā不传福音，甚至mā不好好á引chhōa家己ê子女，soah致使子女离开教会。Chit点实在需要tī上主面前纤悔认罪。

二、tī平地教会ê磨练
回想我tī平地教会ê种种体验，其实就是上主对我ê磨练。

Tī猫盂教会遇tio̍h大地震，看tio̍h墩á脚全村覆灭，体验tio̍h上帝ê能力是何等伟大。

「伊看地，地便震动。」(诗篇一0四：32)

Tī震灾了后，所tòa ê斗室小屋，阮夫妇学习了简单朴素ê sàn-chhiah生活。

Tī头城kap观音山ê庄脚小教会mā hō͘我学习偏僻贫乏ê庄脚生活。

虽然大甲教会比较富裕，但是战争中，各项物资lóng缺乏，犹原脱离不了khiām koh朴素ê日子。由此可见，我tī平地教会ê服事，lóng是万军之主tī磨练小兵，以备将来thang适应山地sàn-chhiah ê生活。

我ê身材天生就修长轻爽，mā m̄-bat患脚痛症。我bat真欣羡肥胖体壮ê身材，朋友却安慰我讲：「你是铁骨á生，无关系，只要无病就好。」

我是平凡ê传道人，所牧ê平地教会lóng是庄脚教会，探访会友tio̍h行路一、二小时远涉道路。因此我ê脚koh-khah坚强，koh-khah适合tī将来登山传教之用，这mā是主ê旨意。

我tī头城mā亲眼看tio̍h旧时phah马烟教会ê所在地变为沧海。这光景hō͘我体认酒亲像海洋大涌，会淹信主ê山胞。全能慈爱ê上帝mā无愿意拯救挂名ê基督徒。

「凡称呼我主阿，主阿ê人bōe-sái lóng进天国。惟独遵行我天父旨意ê人才ē-tàng入去。」(马太福音七：21)