《林茂生博士论文》

 | | | 转寄

第三章 台湾日本学校教育ê起源

作者 英语：林茂生, 华语：林咏梅, 台语：林俊育 2017.09.03

第三章 台湾日本学校教育ê起源（1895年到1898年）
一）日本人占领后siōng早三年ê政治kah社会条件（1895年到1898年）
1895年4月17日马关条约签订，台湾岛屿割让hō͘日本。Chit-ê消息真紧to̍h传到台湾人中间，in tī暴其然（国语ê「突如其来」）ê忽然改变中，茫然仰赖in ê领导者做出行动ê决定。Chit期间siōng主要ê人物是唐景崧，chit时chūn伊已经失去巡抚职，伊考虑tio̍h chit-ê关键时刻，就án-ne kā不忠清廷beh逃走ê念头khǹg tī一pêng，决定反抗日本ê占领。一个月后，to̍h是5月23日，卸任ê唐巡抚宣布台湾民主国成立，并自任总统。

Chit-ê举动表示伊对清廷ê忠心并对日本ê挑战。两工了后，日本舰队开到基隆，军队因此登陆。新总统因为一屑á都无武力装备，就逃往中国大陆。台湾ê首都就tùi北部ê台北移到南部ê旧首都台南；tī chia由出名ê乌旗将军刘永福负起总统kah军事领袖职责。

日本人却真慢chiah向南sak入去，tī 10月19日以强有力ê军队迫近台南。刘永福了解tio̍h用武力对抗是不可能ê。因为án-ne，伊逃往厦门 ; 因为欠缺一位坚强ê领导者kah军事力量，chit-ê新而短命ê共和国就án-ne死亡。台湾就án-ne完全tī日本人ê控制之下，并以台北为首都，设立一个军事政府。

Tī chit时chūn，混乱kah惊惶主宰一切，台湾人无了解新统治者，in惊惶新政权，in随在残兵变盗匪ê处置。这hō͘岛上失去真chē士绅，因为富有ê人尽伊ê所能（ē）带伊ê钱财跨过海峡，in ê家眷也tòe tī in后壁，hiah-ê留落来ê却失去一向引chhōa in运命ê向导。过去两百年来，chit-ê岛屿顶面ê村民lóng仰赖村里有文化kah有受教育ê士绅，tī各方面提供意见á是忠告，tú thang补助中央政府控制无力ê地方事务上。因为chiah-ê士绅ê离开，无秩序kah惊惶ân-ân掠tiâu chit-ê岛屿。

Án-ne ê情况继续到1896年4月，日本ê军事政府被废除，由所谓ê文官政府代替。M̄-koh，台湾人民ê一般态度iáu保留原状，in怀疑新统治者；in无真了解in ê动机，in确实为tio̍h家己ê性命kah财产ê安危来惊惶。大体上，in chit种态度，一直继续到十年以后，to̍h是1905年。 Tī chit段期间，社会ê进步当然大大受tio̍h妨碍 ; 教育上ê合作是无法度期待ê。所呈现ê，kan-taⁿ是存在tī台湾人民中间ê误会kah沉默，日本人对得tio̍h民心mā并无热心。

虽然新统治者以战胜者来到chit-ê岛屿，m̄-koh，它同时以教育者身分负起责任。Tī日本人方面，tùi事实thang证明，chit种责任ê意识是真清楚ê。当第一任总督（注：1）teh beh启程来chit-ê岛屿，to̍h选一位当时tī日本真杰出ê教育家（注：2），派伊担任新成立ê学务部长ê重要职位。这to̍h是chit-ê岛屿顶面有现代意义ê真正学校教育ê开端。 日本tī正式割让后ê六礼拜以内，mā to̍h是完成占领全岛ê三个月前，就为台湾引进第一个学校教育工作。台湾ê学务部设立tī士林，he是首都台北附近ê一个小城镇，起步并无容易。它主要ê困难在tī（1）强盗ê扰乱，（2）当地人民ê民心无法度安定落来，这是主权换手时期ê自然现象。士林是台湾学校教育ê摇篮，tú好是强盗歹（tái）徒之辈tī士林造成学务部难忘ê悲剧。Tī 1896年1月1日，学务部总部kah第一间学校受tio̍h反抗人士á是强盗ê攻击。教育工作人员中间，有六名日本人被刣，学务部里ê记录kah书籍被毁坏。

虽然有真chē困难，工作分两部分稳定推展落去，to̍h是国语学校工作kah国语传习所工作。前者为培训教员来设立，后者为将来设立一般公学校ê基础来计划ê。

二）国语学校ê活动（注：3）
国语学校分做师范部kah语学部，并有几间附属学校。师范部研究岛内普通教育ê教学法，目标在tī培养国语传习所kah师范学校ê教员，以及小学校ê教员kah校长。语学部以教汉人学生日文，并教日本学生汉文为主要工作，而且hō͘ in适当ê教育，以备将来tī政府á是私人事业就职。国语学校ê附属学校以siōng优良ê教学法，为岛上日本人ê学龄儿童kah台湾孩童实施普通教育，并不时供给师范部学生实习教学ê机会。师范部ê学生一定tio̍h是日本人，年龄tī 17岁到29岁之间，in完成中学校四年级á是以上ê程度；语学部ê学生一定tio̍h年龄tī 14岁到24岁之间ê日本人，mā有本地人，拥有附属学校á是国语传习所毕业ê教育程度。师范部ê教科目是：修身（注：4）、教育、国语、汉文、土语（译者按：指台湾话á是Hō-ló话）、地理、历史、数学、簿记、理科、唱歌kah体操。语学部分做两部，to̍h是土语科kah国语科。前者ê教科目是：修身、土语、读册、作文、习字、算术、簿记、地理、历史、唱歌kah体操。后者ê教科目是：修身、国语、读册、作文、习字、算术、簿记、理科、唱歌kah体操。附属学校ê教科目是，修身、国语、读册、作文、习字、算术、唱歌kah体操。师范部修业年限为两年；语学部ê修业年限为三年。第一附属学校ê修业年限为六年；第二kah第三附属学校ê修业年限为四年。师范部有两班，语学部有三班。第一附属学校每一年级有三班。附属学校mā为青年人设有青年科，以及进修课程lóng有它ê个别ê规则。

三）国语传习所ê活动（注：5）
国语传习所ê目的在tī传授学生（台湾人）国语，并hō͘ in日常生活ê基本教育，同时培养in母国（日本）ê精神。国语传习所分做甲kah乙两科；甲科ê学生年龄tī 14岁到29岁之间，并有一般ê智识。乙科ê学生年龄tī 7岁到14岁之间。对甲科ê学生授与通用ê日语并练习基本ê读册kah习字，修业期限为六个月。乙科ê学生训练日语以及学习读册、习字kah算术，修业年限为四年（注：6）。

1898年ê学校制度
国语学校 语学部 师范部 附属学校 附属学校 国语传习所 （以日本人为对象） （以台湾人为对象）

注释
（1）桦山资纪上kā。 （2） 伊泽修二，后来成做贵族院议员，tī西元1917年死，士林芝山岩为伊立碑，hia to̍h是第一个学务部总部设立ê所在，mā是第一间为日本人ê普通学校设址ê所在，tī hia有伊ê六名当开拓先锋ê教员被强盗所刣。 （3）见府令第38号（1896年9月25日）。 （4）"civics” chit-ê名词，有时译做"moralinstruction"。事实上，"civics" kah “moralinstruction”两者kan-taⁿ ē-tàng表达原来ê名词「修身」ê一部分涵义。因为英文字汇里无适当ê字来表达「修身」chit-ê名词，此后以"civics” kah “moralinstruction” 来代替「修身」chit-ê名词。（译者按：tī译文中直接使用「修身」á是日本学校原本ê科目名称。） （5）见府令第15号（1896年6月），kah训令第50号〈1897年）。 （6）甲科学生为成人组，以学习日语为主，乙科ê学生包括cha-po͘-gín-á班，除了日语以外，iáu接受基本学科ê教育。
国语传习所tī 1897年12月ê统计如下：
学生数目 学校数目 教员数目 甲科 乙科 总数 本校16 分校18 72 834 919 1,753