《苏老师 ê 台语教室》

 | | | 转寄

学剃头

作者 吕籽蓉 2024.01.28

学剃头 吕籽蓉
我是50年代出世ê人，大环境ê经济无kài好，真歹趁食，一家伙有六ê大
人，九ê囡仔，头喙真正济，sī大人足辛苦。阮阿爸踏三轮车，阮阿母kah
阿妈in去隔壁庄外省ê眷村，kā人洗衫，嘛阁ài去菜园种菜，mā饲羊逐工
lóng有够无闲，hō͘阮看kah足m̄甘--ê。我kā阿母讲，我mài读国中，我来
tàu趁钱，阿母讲，mài读册ē像青mê牛ē足甘苦，我讲等大汉咱若较ū钱
khah去读册啦。上疼我ê阿爸听kah足感心，讲我chiah-nī会晓想，beh
kā sī大人重担tàu分担，tō kā我chhōa去弥陀ê二高村五叔暇学剃头，讲
手若有学一把功夫就m̄惊iau腹肚，彼当阵囡仔学师仔足甘苦透早爱烧涂
炭，hō͘烟熏kah目睭bi bē开，目油㴙㴙滴，杂差仔工课有够济，抾材、破
材、磨刀、洗面巾，无家己ê时间，阁ū别ê师傅知影我是头家ê侄仔，定会
tiau工kā阮糟躂只有喙。齿根咬leh含着目屎m̄敢哭出来，有时气甲挡袂
tiâu，足想beh放弃五婶一直苦劝我较忍耐--ê，总有一工你mā会出头天做
师傅时，这马nā放弃足无彩mā对阮阿爸歹交代，有理是训练无理当作磨
练，食苦当作食补，我想着有答应过阿爸ê代志，kā家己讲: 「天下无难
事，只惊有心人食得苦中苦，方为人上人!」自我安慰，鼓励家己!较认真
上实在，经过两冬，五叔讲我ē-sái出师ah，叫五婶chhōa我去电头毛较像
大人款，hah电好看起来真正有像师傅ê型体，真是三分人七分粧。时间teh
过有够紧，目一ē nih经过五十冬，五叔kah五婶in lóng无tī世间，我真
感谢in对我ê栽培我较有今仔日ê成就家己开店做头家。