《巴克礼普世版圣经「汉罗+Ruby」试读本》

 | | | 转寄

巴克礼普世版（试读本） 提多书第三章

作者 巴克礼普世版小组 2016.05.01

基督徒(ki-tok-tô͘)ê行 为(hêng-ûi)
1 Tio̍h提 醒(thê-chhéⁿ)大家(tāi-ke)服 从(ho̍k-chiông)执 政 者(chip-chèng-chiá)kah政 府(chèng-hú)官 员(koaⁿ-oân)，ài顺 服(sūn-ho̍k)chiah ē-tàng随时(sûi-sî)便 便(piān-piān)来做(lâi chò)ta̍k项(hāng)好事(hó-sū)。2 Tio̍h劝(khǹg)in m̄-thang毁 谤(húi-pòng)，m̄-thang冤家(oan-ke)，tio̍h温和(un-hô)友善(iú-siān)，用 温柔(ēng un-jiû)来对 待(lâi tùi-thāi)所有(só͘ ū)ê人(lâng)。3因为(in-ūi)咱家己(lán ka-kī)以 前(í-chêng)mā是(sī)无知(bû-ti)、悖 逆(pōe-ge̍k)、受迷惑(siū bê-he̍k)，做(chò)各 种(kok-chióng)私欲(su-io̍k)kah享 乐(hióng-lo̍k)ê奴隶(lô͘-lē)，tī恶毒(ok-to̍k)kah怨妒(oàn-tò͘)ê中 间(tiong-kan)teh生 活(seng-oa̍h)，互 相(hō͘-siōng)怨 恨(oàn-hūn)，彼 此(pí-chhú)讨厌(thó-ià)。4 M̄-koh咱(lán)ê救 主(kiù-chú)上 主(siōng-chú)ê慈悲(chû-pi)kah仁爱(jîn-ài)显 明(hián-bêng)出 来(chhut-lâi)ê时(sî)，5他(i)就 拯 救(chiū chín-kiù)咱(lán)，m̄是因为(sī in-ūi)咱家己(lán ka-kī)ê好行 为(hó hêng-ûi)，是因为(sī in-ūi)他(i)ê怜 悯(liân-bín)，通 过(thong-kòe)重 头 生(têng-thâu-seⁿ)ê洗礼(sé-lé)kah圣 神(sèng-sîn)ê更 新(keng-sin)来拯 救(lâi chín-kiù)咱(lán)。6圣 神(sèng-sîn)就是(chiū-sī)上 主(siōng-chú)通 过(thong-kòe)咱(lán)ê救 主(kiù-chú)耶稣基督(iâ-so͘ ki-tok)，丰 丰 富富(hong-hong hù-hù)赏赐(siúⁿ-sù)hō͘咱(lán)。7 Hō͘咱(lán)thang通 过(thong-kòe)他(i)ê恩 典(un-tián)来(lâi)叫 做(kiò-chò)义 人(gī-lâng)，来 承 受(lâi sêng-siū)咱(lán)所(só͘)ǹg望(bāng)ê永 远(éng-oán) 活 命(oa̍h-miā)。8 Chit-ê话(ōe)实 在(si̍t-chāi)讲 了(kóng-liáu)真(chin)tio̍h。我(góa)ài你(lí)特 别(te̍k-pia̍t)强 调(kiông-tiāu)chiah-ê tāi-chì，hō͘信(sìn)上 主(siōng-chú)ê人(lâng)专 心(choan-sim)做好事(chò hó-sū)。Chiah-ê tāi-chì lóng是好(sī hó)，koh对 人(tùi lâng)有利益(ū lī-ek)。9 M̄-koh你(lí)tio̍h闪 避(siám-phiah)愚 戆(gû-gōng)ê争 论(cheng-lūn)，族 谱(cho̍k-phó͘)ê纷 争(hun-cheng)kah律 法(lu̍t-hoat)ê争 执(cheng-chip)，因为(in-ūi)chiah-ê tāi-chì lóng是(sī)无利益(bô lī-ek)koh无价值(bô kè-ta̍t)。10制 造(chè-chō)纷 争(hun-cheng)ê人(lâng)，kā伊(i)警 戒(kéng-kài)一 两(chi̍t-niú)pái了 后(liáu-āu)，就(chiū)m̄-thang koh kah伊(i)往 来(óng-lâi)。11你知(lí chai)chit种(chióng)人(lâng)已经(í-keng)败 坏(pāi-hoāi)，伊(i)án-ne继 续(kè-sio̍k)犯 罪(hoān-chōe)是(sī)teh拟定(gí-tēng)家己(ka-kī)ê罪(chōe)。

最 后(chòe-āu)ê教示(kà-sī)
12我(góa)差 派(chhe-phài)A-thê-má á是(sī)推(thui)基古去(khì)你(lí)hia ê时(sî)，你(lí)tio̍h赶 紧(kóaⁿ-kín)来(lâi)Ni-ko-pho-li̍p chhōe我(góa)，因为(in-ūi)我 已经(góa í-keng)决 定(koat-tēng)beh去(khì)hia过(kòe)冬 天(tang-thiⁿ)。13你(lí)tio̍h尽 量(chīn-liōng)帮 助(pang-chō͘)法律教师(kàu-su)Se-la̍p kah亚波罗(a-pho-lô)旅行(lí-hêng)ê需要(su-iàu)，hō͘ in thang安心(an-sim)出 发(chhut-hoat)。14 Mā tio̍h吩 咐(hoan-hù)咱家己(lán ka-kī)ê人(lâng)，tio̍h学 习(ha̍k-si̍p)做好事(chò hó-sū)，来 供 给(lâi kiong-kip)hiah-ê实 在(si̍t-chāi)需要(su-iàu)ê人(lâng)，chiah免 得(bián-tit)无结 果 子(bô kiat kóe-chí)。15 Kah我(góa)tī chia ê人(lâng)lóng beh kā你(lí)请 安(chhéng-an)，请(chhiáⁿ)替(thè)阮(goán)kā hiah-ê同 信(tâng-sìn)ê好朋 友(hó pêng-iú)请 安(chhéng-an)。16愿(goān)上 主(siōng-chú)ê恩 典(un-tián)kah lín大家(tāi-ke)同 在(tông-chāi)！