《台文通讯精选》

 | | | 转寄

向鲑鱼致敬

作者 秀美 2007.11.04

B.C. (英属哥伦比亚) 省若是到十月，拢会引起chē chē人去hia观赏鲑 (kôe) 鱼ê回游，今年(1998) tú好是Sockeye Salmon每四年大回游ê时阵。1990年亚当斯河 (Adams River) 破记录大约有三百万尾Sockeye Salmon游转去故乡产卵。1994年因为商业渔船乱掠鱼kap水土ê破坏，只有50万尾ê鲑鱼成功转去到in ê出生ê所在，所以今年B.C.省政府严禁超量捕掠这类ê鱼种。10月17日阮去到亚当斯河ê时，根据渔业专员ê估计，已经大约有150万尾鱼，kā清清ê细条溪染红ah，in也继续tī hia生产in ê第二代。渔业是B.C.省森林以外排第二位ê产业。美国kap加拿大政府有开销真大ê经费，去研究鲑鱼ê生态，按怎改善河流ê水质(比如废水处理，拓宽急流ê所在做人工通道，hō͘鱼á会tàng顺利通过难关，转去故乡) 增加鲑鱼ê产量，提供美加两国市场ê消费。

太平洋ê鲑鱼拢总有六种，除了樱花鲑鱼kan-taⁿ tī亚洲南太平洋看会着以外，其他五种是Chum Salmon、Sockeye Salmon、Coho Salmon、Pink Salmon kap Chinook Salmon。Pink Salmon每两年(单年)回游，所以今年菲沙河口ê鱼群tō无看着in ê阵容。Chum kap Pink两种鲑鱼tī第二年ê春天冰溶(iûⁿ)了后，tō直接向大海siû。其他三种鲑鱼tī五月左右搅(kâ )群结队，tī乌暗暝向大湖siû，闪过鸟类、鱼类ê捕食kap攻击，tī湖里生长一年了后，才siû去北太平洋生活二至五年。鲑鱼ê体内有特殊功能ê细胞，会tàng平衡盐份kap水份，hō͘鱼á会tàng自由出入淡水kap海洋。 今年是Sockeye四年ê大回游，in是商业kap渔业所重视ê鱼类，价值占市场总价值ê三分之二。因为Sockeye ê肉深红结实，koh真幼软，滋味真好，通常市面上ê Smoke Salmon tō是这类ê鱼制成ê，是全世界ê人真爱ê高级食品。

今年台加文化协会主办ê亚当斯河鲑鱼大回游生态旅游，一暝两日，由环保生态专家林博士领队，沿路做详细ê解说。顺着鲑鱼回游ê河流(菲沙河kap伊ê支流汤普斯河到小支流亚当斯) 向顶面驶去，陪in转去故乡，意义真大。Tī ba-suh顶头向下面看，看着山谷中间水涌真强ê河水，koh khah深深体会鱼á一路所经历ê苦难，in m̄惊困难向顶头siû去，战嬴急流，跳过二、三尺ê小瀑布，千辛万苦，转去到in ê出生地，生产第二代，牺牲自我，完成使命，是非常奇妙ê自然奇景。后摆若想beh观赏Sockeye搅群结队，kā溪水染红ê景色，tio̍h-ài等到公元2002年ah。

这摆专工ùi多伦多去温哥华观赏这个hō͘人感叹ê大自然奇景，hō͘我感触真深。鲑鱼ê轮回生命，落叶归根，对家乡bē-tàng分割ê感情，宇宙生命再生ê伟大kap奥妙，按一尾鲑鱼ê生kap死，hō͘我体会着西藏生死书内有一段佛陀ê话「咱ê存在亲像秋天ê云hiah-nih短，看着众生ê生死，亲像是看着舞步，生命ê时光亲像是天顶ê sih-nà，ná像急流冲落山脊(chiah)，紧紧流失」。咱人有一日总是会死，m̄-koh m̄知影tang时会死，或是按怎死？咱希望会tàng活真久，所以对死亡非常惊惶。看着完成责任的鲑鱼，成千成万ê死尸，散布tī溪水ê两岸kap河流里。In短短四年ê生命，无一点á惊惶，听着故乡呼叫的声，一群一群，一队一队，ùi二、三千海哩ê外海，赶来到菲沙河口，koh再向koân逆(ge̍k)游，转去到亚当斯河，大约有四百九十公里，in无怨无悔，行入传宗接代kap死亡ê不归路，遵照几万年in祖先仝款ê脚步，壮烈来结束kap奉献in宝贵的生命。

菲沙河四旁有九百外条大大细细ê河kap溪，亚当斯河是其中之一，是Sockeye ê大本营。四年了成熟ê鱼á，in身躯内ê某种器官hō͘ in信息，tī真正确ê仝一个时间，真有秩序，集合tī菲沙河口，快快乐乐行向归乡ê路。仝一条支流ê鱼á，一群一群集合，bē混乱去，一梯次，一梯次回游转去。

成熟ê鲑鱼tī海洋里全身是银白色，脚脊 phiaⁿ是蓝绿色。Siû泅入菲沙河了后，in开始禁食，kan-taⁿ用身躯内ê油质kap蛋白质，来维持每日所需要ê能量kap体力。In暝日赶路，每日大约需要siû 25公里，ài 18日才会siû到目的地。In进入溪水了后，皮肤会起变化，变kah真厚koh真粗，色tì 变做血红，头壳变做绿色。公ê鱼骨骼会起大变化，脚脊phiaⁿ ê部份会thó͘出来，嘴变做钩á形，嘴齿变kah真尖，以后会变做是攻击其他公鱼ê鱼器。母ê鱼骨骼并无jōa大ê变化，因为腹肚内有成千ê鱼卵，变kah真肥，只有Sockeye ê皮肤变做血红色。In一路经历急流，hō͘石头割kah规身躯拢是伤，头破血流，每摆渡过一个急流，in会规阵 tī静静ê水边休息，恢复体力了后，才koh再向前siû去， 一心一意只有想beh转去故乡。in有真敏感ê鼻孔，会tàng辨认水中传来ê故乡ê植物、微生物、野草ê混合味，正确chhōe着出生ê河道。

当成千成万ê Sockeye来到水清安静ê亚当斯河，母鱼开始chhōe适合产卵ê所在，公鱼会tiàm边a守护，并且kā 其他ê公鱼赶走，母鱼会用身躯kā细块石头sak开，koh再用强koh有力ê尾挖一个phiat á形ê窟á，一面摇尾á，一面tī窟á内生卵，公鱼随时tī卵顶放精，母鱼通常会做几个窟，才会kā卵pàng完，然后in会真小心kā石头e转去pàng过卵ê窟顶，来保护chia ê受精卵。鲑鱼完成生卵了后，通常是母鱼先死，接落来公鱼也会接续死去。河里kap两旁ê鱼尸，变做河里其他鱼类ê食品，成千ê鹰鸟mā tī空中天顶飞，等待拾食chia ê死尸，暗时其他ê动物也会来分食iā 散tī 两岸ê鱼肉。鲑鱼就按呢壮烈结束îne 一生。in 肉体ê结束却是另外一个活力生命ê开始，一切拢是hiah-nih奇妙，koh是一个谜，只有感叹宇宙伟大无形ê力量ah。

亚当斯河tī十一月中koh再恢复过去ê平静，大自然tī冰雪am-khàm下困去，m̄-koh另外一个生命却是恬恬tī石缝内开始ah。第二年ê五月，亲像pín针hiah-nih大ê细只鱼，tī暗暝sóa去附近ê大湖(Shuswap Lake)里生活一年，大约tī一岁半，in会离开淡水湖，顺着in父母siû转来ê河道游入太平洋，tī hia 渡过二年ê海洋生活。根据B.C.渔业局ê统计，每一只母鱼会tàng生产四千粒卵，成功受精ê大约有800粒，泅入湖中生长ê只有400尾细只鱼，成功泅去海洋ê kan-taⁿ chhun 200尾，四年后成功转来到菲沙河口ê只有十尾，八尾tī河口hō͘商业鱼船掠去，最后只有chhun二尾会tàng顺利转去到出生地，产卵留传îne后代。

鲑鱼tī短短ê生命周期，m̄惊千山万水路途ê遥远，勇敢向前，无失志，m̄惊一切ê困难，抱着一般人对故乡ê热情，辛辛苦苦留传后代，无怨无恨，壮烈来死，看了hō͘人感动koh感伤。希望tī四年后ê十月，当in成熟回乡，顺着菲沙河回游，开始in生命最后ê旅程ê时，会有koh khah chē ê人来亚当斯河，in ê故乡，kāin致人类最高ê敬意！！