《台文通讯精选》

 | | | 转寄

瘿á

作者 清风 2007.09.30

若是bat tī台湾tòa过ê人，加减拢bat生过粒á，有ê大，有ê细，有ê红红肿肿无脓，两三工就无代志，总是，你m̄知bat听过瘿á无？Che是我tī高二hit年发生ê代志。

Hit年ê热天，有一日，tī洗身躯ê时，发现腹肚边，有生一粒粒á。当时，感觉红红chiūⁿ（痒） chiūⁿ，也无特别挂意。嘴同嘴kā妈妈讲，妈妈有六个kiáⁿ，平时对我hoah疼hoah酸；常常褒so(搓)一下就好ah；无想着，伊看了后，随时chhōa我去民生西路口，chhōe田仙。田仙是一间tī民间开业ê汉医，差不多阮民生西路矮厝庄á人ê肿瘤、粒á，拢用伊ê膏药，贴(tah)贴leh就好。普通时，伊ê生理真ka-ia̍h,若是普通粒á,大约拢是看看一两摆，就叫你the̍h药膏转去贴贴leh，几工了后，就好kah离离。 总是，伊第一摆看着我ê细粒粒á ê时，伊kap妈妈讲：「Che若准m̄是普通粒á，m̄-koh，几工了后，我就会知，你这贴膏药the̍h转去贴看māi…。 」我就照田仙ê吩咐，乖乖就将膏药贴tī腹肚边ê粒á顶面。

两工了后，我发现粒á已经涨大，比膏药koh khah大，去hō͘田仙koh换药ê时，伊用koh khah大ê膏药贴tī粒á顶，真稀罕ê,并无半点脓，也无看着白头。田仙讲： 「Che是瘿（eng）á，你ài khah忍耐淡薄，ài每三工来换膏药，一直到看着脓头走出来，chek出来了后才会好。」田仙是阮庄头上盖受尊重ê草药医，伊看过ê症头bē算得chē ；所以虽然hit时升学ê压力真大，补习、自习一大堆，总是去田仙hia换膏药ê代志，拢m̄敢chhìn-chhái马马虎虎。

就按呢，过了大约三礼拜外，hit粒ná红豆á ê粒á，已经涨kah差不多有一粒柳丁ê大瘿á｡天气koh热，功课也chē,犹koh ài细腻无beh hō͘人动着hit个疼ê所在，有时感觉真chhiah-ia̍h，也正正就是tī hit个上chhiah-ia̍h ê暗暝，田仙tī拍开膏药，看我ê瘿á ê时，雄雄puh一句：「脓头看着lah，koh两三工，大概就会发出来lah，khah细腻leh。」 然后，koh用酒精消毒，照常换一块上大ê膏药。两工了后，洗身躯soah，突然感觉瘿a2e5所在，痒痒湿湿，妈妈就随时用酒精tī四边消毒，然后，就将膏药拆开，hit时阵，累积tī瘿á内ê脓就慢慢á che̍k出来。Hit暗，chek出来ê脓，差不多有七分半碗头á hiah chē，小弟小妹拢tī边a看kah目睭青kìm-kìm;敏感ê二妹真m̄甘问我：「会疼bē?」因为，脓实在chē kah惊人。上稀罕ê是；经过hit段ê诊疗，我tī这个时阵，反倒转，规身躯轻松起来，因为，我感觉我体内ê lah-sap 、毒素拢总透放出来，所以，bē疼，一点á to bē疼。颠倒，是tī接受治疗，tī puh 脓头ê hit段时间，真郁闷，真chhiah-ia̍h，到chit-má为止，我若想着，就感慨无限，整个过程m̄免开刀、手术，而且以后无koh再发，kan-na tī 腹肚边有一个细细ê疤。

最近，看着新政府就任，所遇着重重叠叠ê代志，我突然觉悟，咱台湾，经过半世纪国民党ê统治，是已经亲像生了潜伏未发ê瘿á，新政府tī治疗贴膏药，引出病源ê阶段，常常受误会，别人ê粒á两三贴膏药就好溜溜，你治chiah-ni̍h久，一定是医术无高明，soah m̄知影，斩草ài断根，治瘿á ài引出脓头，按呢，才会药到病除，恶脓尽出， 规个身躯得着根本ê，永远ê治疗。