《台文通讯精选》

 | | | 转寄

灌溉母语ê田园

作者 李勤岸 2007.06.24

阮某请我lim一杯咖啡，叫我ê笔借伊，kā写伊教台语ê经验hō͘大家做参考。

本文…

我tī市内大汉，m̄ bat做过sit 、m̄ bat种过田，不时听阮翁讲in庄脚人播稻á、搓草jōa辛劳、ak水灌溉jōa艰苦，听bóng听，无法度体会。一直到我有机会pih手ńg 、卷裤脚，潦落去田里，家己tī日头脚做sit，我才完全了解伊ê讲法。

二冬前，有一个机会，我tī美国ê大学教一冬台语。

教台语ê教授开二班台语课，初级班kap中级班。伊爱我做伊ê助教，负责初级班ê教学。中级班有三个学生，拢是阿tok á ，以前就有修过教授ê课。初级班有六个人，拢m̄ bat修过教授ê台语课。有一个日本人，是博士班ê学生，bat去台湾留学过，加减会晓讲台语，伊学习真认真。Chhun ê拢是台湾来ê留学生，tī台湾专科学校毕业，来美国读大学部。In koh bē bái，无像台湾chit-má ê少年学生kan-na会晓讲华语，in ê台语讲了犹会使。不过，in修课ê动机主要是beh来the̍h营养学分，因为in ê功课真重，ài修真chē课，台语已经会晓讲，想讲修这门课上轻可。

教授tī前几节课，kā重要ê概论lecture了后，就hō͘我负责实际ê操练工作。医生看病看了，注射ê khang-khòe mā是交hō͘护士去处理。

按呢我就开始体会做sit人ê辛苦。

有ê草是真蛮皮，无hiah–ni̍h好处理，m̄是由在你搓。In本底想beh轻松来the̍h学分，想讲chhìn–chhìn-chhái-chhái三学分tio̍h曲脚lián嘴须kā lián起来。

M̄-koh我感觉bē使害人开钱来美国读册无学着物件，而且我koh是第一遍做老师，家己真紧张，用真chē时间准备，上课前一工规暝拢困bē去。

田潦落去a，当然ài kā草搓hō͘清气，kā水泼hō͘满田，hō͘稻á有够营养thang大欉。In kā我讲是beh来the̍h营养学分，我想就是这个意思，期待我hō͘ in真chē营养份thang大欉lah！

教授讲：「罗马字是学台语上基本ê。」

In感觉学罗马字是加ê，in讲罗马字是用来教bē晓讲台语ê外国人，in已经会晓讲台语，根本无需要学罗马字。

我hō͘ in讲kah m̄知beh按怎应。

In koh讲罗马字是西方罗马帝国ê人leh用ê字，是外国ê物件，咱m̄免用，咱用汉字tō好。

我走去教授hia讨救兵，教授叫我讲故事hō͘ in听：

「罗马字本底是西方罗马帝国征服世界ê时，tī中东发现ê文字，发现真好用就用来征服世界。果然规世界hō͘伊征服了了，chhun台湾犹未征服，就派兵来攻打台湾。想bē到，去hō͘台湾ê原住民拍败，罗马帝国就用罗马字进贡hō͘台湾，所以咱chit-má才有罗马字thang用。」

学生听了笑kah东倒西歪，讲che kap in读ê历史真无仝，概成是臭弹，m̄ koh真趣味。

后来我发现需要加强in ê台湾意识，若有台湾人ê意识就khah要紧家己ê语言文字。我就开始教in读真有台湾精神ê台语诗，koh hō͘ in 读真有台湾意识ê 陈雷ê小说，发现in愈来愈有趣味，愈来愈爱上台语课。

我koh招in参我下昼时tī学校ê餐厅lim咖啡，做伙开讲，讲一kóa台湾故乡ê代志。

咖啡lim了soah tiâu leh。大家时间到就准时来。听讲咖啡mā真有营养，mā是西方人进贡ê 。我发现in这区台语班ê田，用咖啡灌溉了后，稻á一暝大一寸。

教一冬台语，我ê心得是：台湾人母语这区田，无爱hō͘伊抛荒去，ài用心种作，用台湾心去犁田。另外，用咖啡灌溉mā真有效！