《台文通讯精选》

 | | | 转寄

若是时间会倒转去

作者 陈雷 2006.03.12

旧年我ê老母tī台北过身了，有一包身躯边ê物件留落来。The̍h转来加拿大了后，一直无去tín动。最近tháu开来看，内面一kóa旧物件kap相片、一张五十kho͘ ê美金、kap一张美国ê批，就是我二十七年前出国ê时，来到美国了后写转去ê第一张批。Chit-má读起来，soah 增加了失去亲人ê空虚。一时非常ǹg望，若是时间会tàng koh倒转去二十七年，设使我有机会koh再来写这张批，内容大概也是相像，总是我会用台语写，才会khah顺嘴，意思khah真切。所以我就kā这张批按头到尾用台湾话重写一摆，算作是重寄hō͘伊一封慢了二十七年ê批：

「阿母，我已经平安来到美国，飞机起飞ê时，土脚顶ê物件渐渐变无去，我知影恁tī机场内面，也一定是目睭金金看我ê飞机飞无去。几礼拜以来为着无êng出国ê仓pōng,变做了一时ê和平，雄雄体觉着离别ê现实，像紧流ê大水hit款，我家己问家己，……是为着啥物？……Tī tang时才会koh转来？……。坐tī隔壁ê美国阿婆问我一句话， 我kā伊讲：「I am free now !」我ê英语伊m̄知听有无？若是听有，我ê意思伊m̄知知影无？

我tòa tī宿舍，家己一间房间。窗á口看出去，对面远远是一片阔阔半山ê枫树，叶á已经开始teh变色，有ê金ê,有ê红ê｡西照日ê时，景致kap咱厝里hit本杂志介绍ê美国仝款仝款，chia就是美国ê密西根。

我三顿tī病院ê餐厅食，ta̍k日lóng食鸡。病院惊我新来欠钱用，先发一个月ê薪水。其实tòa tī宿舍，无啥费用。也无欠钱。

Tú来iáu未有朋友也无遇着熟悉ê人。Tī chia虽然孤单，但是这自由ê空气hō͘我心情真和平。我日日夜夜思念恁，亲像恁teh思念我按呢。

这张批内面有一张美金五十kho͘，hō͘恁作费用。阿林、阿文khah chia̍p写批来联络。