《台文通讯精选》

 | | | 转寄

Embro ê马偕博士

作者 Wilma Welsh 2006.12.17

我真荣幸来参加今á日ê特别奉献礼。Tī恁ê历史上，有一个真大ê荣耀，tō是上帝呼召恁ê子弟Rev. Dr. George Leslie Mackay 去Formosa，chit-má叫做台湾ê所在做伊ê工。恁无的确m̄知影这个名tī台湾hō͘人讲起jōa-chē摆，伊受台湾人jōa大ê疼痛。 今á日，我beh恭喜恁教会为着伊tī台湾所做ê事工来举行这个纪念匾奉献礼。

台湾ê教会拢真尊敬马偕博士。旧年ê 6月30日，tī Woodstock ê法院门口咱有为马偕博士设立一座铜像。 Che是淡水ê真理大学、古早叫做Oxford 学院送ê。马偕博士是Oxford学院ê创设者。

这个Zorra 乡ê子弟tī台湾留落来ê是啥物款ê传奇故事leh？伊m̄-niā受hia ê基督徒ê尊敬，mā受着非基督徒ê尊敬。我会记得有一摆，我穿一领纪念马偕过身100年ê短衫tī彰化街á teh行，衫顶面有伊ê翁á头。一个tī店里teh卖物件ê少年查某gín-á kí hit个像用台湾话讲：「真好ê人」。伊koh讲马偕是英国人。我随时kā伊讲，马偕是恁chia去ê加拿大人。

George Leslie MacKay tī 1844年3月21日出世tī离这个教会无jōa远ê十号路ê所在。伊ê pē母是tùi Sutherland森林区来ê Scotland高地难民。伊是咱Zorra乡ê教会所养成ê四十个牧师中间ê一位。伊tī美国ê Princeton kap英国ê Edinburgh大学读神学。伊是加拿大长老教会第一位去台湾ê海外宣教师。

Bē晓半句台湾话，伊一个人tī 1872年3月初9去到台湾。伊相信伊是受着上帝ê呼召去向台湾人传福音。伊tiāⁿ-tiāⁿ hō͘人叫做『乌须蕃』。

台湾这个国家自早到taⁿ拢teh苦斗，因为伊ê人民过去受着外来ê葡萄牙人、荷兰人、日本人kap 中国人ê 统治。Tī日本人ê统治下底，台湾人无好过。但是第二次世界大战了后tùi中国来ê蒋介石政权，hō͘ in koh-khah艰苦。台湾人无受统治者ê看重，所以in要求in ê领导者应该ài有职位。国民党要求in提出领导者ê名单。名单提出了后，每一个人kap in ê朋友拢无外久tō hông掠去枪杀。听讲有3万到10万ê台湾人tī 二二八事件(1947年2月28日) hông谋杀。有一本历史册提起一位加拿大传教者ê护士Hildur Hermanson ，hit阵tī马偕病院门口救人ê代志。Hit个兵á m̄敢kā伊tōaⁿ枪，所以伊会tàng救人。现此时ê台湾政府已经有起一个纪念碑来纪念当时牺牲ê人。有真久ê时间，台湾ê人拢m̄敢讲着这个事件。我会记得bat问一位当时是少年家ê牧师朋友。我kap伊真熟sāi，所以敢问伊这款问题。伊讲伊mā bat问in老pē,m̄-koh in老pē讲知影lú少lú好。这个牧师ê兄哥tī我犹tī台湾ê时，犹hō͘人关tī监牢。伊是tī读齿科医ê时，用英语写一篇政府无kah意ê文章，hō͘人掠去关。台湾有真chē政治良心犯，真chē是少年人。犹有真chē政治良心犯tī全世界，in拢无放弃台湾beh 独立ê目标。In为着台湾人ê人权khiā出来。我相信这个勇气是tùi马偕博士hia来ê。今á日tī咱ê中间mā有一个bat hō͘人关过ê青年人beh为台湾讲几句话 (译者注：罗益世代表台湾社团致词)。

咱若tī这阵倒转去看133年前，我真正ài感谢上帝kā海外宣道这个宝贵ê礼物带去hit个岛屿。咱若听着台湾人ê历史kap奋斗，咱tio̍h会想起基督教对台湾人民ê影响力。台湾有真赞ê医疗系统kap技术，有水准真koân ê现代化教育，拢是早期基督教宣教师所开创ê。马偕博士tī台湾北部建立真chē基督教会，是大家所公认ê tī北台湾ê基础。英国宣教师比伊早七年去到台湾南部传福音。

台湾这个国家继续teh受苦，台湾人民mā继续teh受苦。In为着in国家ê定位teh奋斗，对in来讲，无hō͘联合国承认是一个真痛苦ê代志。 Tī这个国家，教会无法度m̄ chhap政治。 In知影tī国民党政权戒严统治下底ê人民是按怎过日ê。因为in是基督徒tō受迫害。教会知影这种政治权力一定ài改革。我本身tō有因为是基督徒，tī戒严统治下痛苦kap奋斗ê经验。

台湾到taⁿ犹m̄是世界卫生组织ê会员，甚至连观察员ê身份to无。但是两年前SARS发生ê时，mā无避过台湾。

过去几冬来，我拢有kap加拿大ê教会团体去台湾访问。每一摆去到淡水，我无法度无受感动。真chē人真久以前，tō拢有听过马偕博士所做ê工 – 阮khiā tī hia，koh hō͘阮想起这种忠实宣道ê工。 阮行过淡江中学ê校园，探访马偕博士ê墓园。基督徒行过马偕博士墓园ê时，大家拢真恬静。Tī这个小小ê墓园边，有教室，有gín-á teh上课，真chē活动，mā真吵。马偕博士tī淡水开始伊ê事工，伊ê后生George William Mackay tī hia创设淡江中学。我相信George Leslie kap George William两位马偕tâi tī这个非常无êng kap真吵ê墓地，对in来讲是真适当ê。

恁应该为恁ê 子弟感觉骄傲！这个人有作人应该有ê勇气，mā有kap亲像军队应该有ê坚忍。台湾mā为恁ê子弟感觉骄傲！

(这篇是Wilma tī 2005年2月20日tī 马偕ê故乡Embro ê Knox联合教会、马偕纪念匾奉献礼ê演讲稿，陈星旭翻译做汉罗。Wilma tī台湾长老教会工作六冬。伊 tī 2004年退休转来加拿大故乡。2006年担任加拿大基督长老教会总会议长。关于伊tī 台湾ê工作奉献，请参考台文通讯106期 “疼台湾ê威厉心姑娘”。 )