《台文通讯精选》

 | | | 转寄

孝女ê愿望

作者 阿粉姐 2006.10.08

美子小姐虽然真了解老母ê疼，但是对老母表现母疼ê方式，感觉真疑问。

亲像讲，食饭ê时，老母总是家己食昨昏ê chhèng饭，khioh gín-á食chhun ê菜，koh时常讲：「爱食ê无食，爱穿ê无穿，才kā恁饲大汉。」

美子ê想法是老人也是人，应该享受人ê价值，老母完全bē记得家己ê精神，gín-á感觉艰苦心，按呢牺牲家己ê享受，gín-á绝对bē-tàng感觉一sut á欢喜kap幸福。

这款想法，若直接kā老母讲，koh惊会伤着老人ê心，美子就想着用读者投书ê方式来表达心声。

几日后，某一个报纸刊出一篇用假名写ê读者投书，按呢写：

「老母俭肠neh肚，拢是ǹg望hō͘ gín-á了解，但是这款自我克苦ê古早作风，却bē hō͘ gín-á感觉家己是生活tī一个幸福ê乐园里，试想，将家己ê快乐建立tī 老母自我牺牲ê顶面，做子女ê 会满心欢喜？子女敢bē 感觉心疼？koh老母也是人，tio̍h亲像按呢来生活！我相信按呢才是母kiáⁿ间真正ê幸福。」

报纸刊出来了后，读者有真chē反应，正反两面ê意见拢继续刊tī 报纸，当然美子ê老母也有看着。

「现在ê gín-á敢chiâⁿ实是用这款心情来接受老母ê心意？你ê看法按怎？」

「母亲，我完全赞成投书者ê意见，我认为有比自我牺牲hit种消极ê幸福koh khah可贵ê积极ê幸福。」