《台文通讯精选》

 | | | 转寄

蝉á声

作者 胡民祥 2006.07.30

啊，蝉á叫ê声。

Tùi二楼ê窗á传入来，m̄知伊是歇tī tó位，是tī青翠lò lò ê枫树，抑是koân kah beh达天ê碎叶树，抑是koh khah远ê一大片ê青松。

风吹微微，为何，短短急急三声tō停去。敢是我teh做梦？M̄-koh，白日梦是无可能lah。

北美洲ê蝉á难得叫，至少，阮宾州西旁ê山河林乡ê蝉á，就是按呢，m̄肯展喉献声长叫。虽然罕得叫，叫着koh急koh短，总是拢会引来思乡ê情绪。

阮嘉南平原故乡ê蝉á，in上爱贴tī苦楝树，抑是檨á丛，叫规个热天。今年五月中旬，我转去探访父母，转去到曾文溪岸ê胡厝寮。我有一工，行落曾文溪埔ê田园，寻chhōe童年牵牛食草ê梦，行到麻善大桥ê南旁桥头。桥头有一个部落叫做溪底寮，有十thóng户ê人家厝。

Beh入庄头ê路边一排ê檨á树，续落去是一簇一簇ê竹抱。我khiā tī檨á脚，风一阵一阵吹过来，蝉á直直叫，一声过一声，hō͘阮流浪海外ê游子，听kah神神，时光转向童年。

Gín-á时代，用竹篙粘点á胶，掠苦楝树ê蝉á。Khah gâu ê gín-á，用棕蓑丝拍活结，缚tī竹篙尾溜，kap蝉á斗智慧。棕蓑丝幼koh细，蝉á m̄知是陷阱，伸脚爪kap丝线爽chhit-thô。想bē到，一时大地动，soah kap竹篙做伙lak落地面，去hō͘ gín-á掠去。

蝉á声。我想beh听台北林口「竹林山寺」ê蝉á ê蝉声；茶园边相思树ê蝉á ê叫声；陈文成童年ê蝉á声。

十二年前，文成离开宾西山河之乡，转去台湾探亲，枉死母校台大蕃薯园，就是蝉á叫天ê季节。

听着蝉á ê叫声，阮tio̍h会想起伊，想起tī热天ê时，替同乡会募款，阮做伙tī水边公园，卖台湾菜丸á ê往事。若像故乡ê蝉á直直叫，伊拢bē thiám。直直叫人客，来买菜丸á。

听着蝉á叫天，阮就会怀念故乡，阮就会想起文成。