《台文通讯精选》

 | | | 转寄

门内门外

作者 阿秀 2006.07.16

Tī我读册ê时，国民党tī台湾推行ê国语政策已经真成功，特别我读ê拢是女子学校，查某gín-á比较khah乖，khah听话。「北京话」tī有心ê教育政策下面成做真普遍ê语言，用来读册、思考、写文章。时间一下久，tī日常生活虽然讲台湾话，但是若beh讲道理，就ài用「国语」才讲会清楚，我ê阿母bat真受气讲「你讲ê话，nái哩哩罗罗亲像外省gín-á?」这种情形，出国了后mā无改变。88年有一摆去普林斯顿拜访一位同乡，每一摆我开嘴讲话，主人就掠我金金看，后来伊挡bē tiâu，问我「你是按怎拢讲北京话？」che是我第一摆听着我讲ê话叫做「北京话 」。

90年来多伦多，因为tī台语教会出入，四周围ê同乡讲台语真自然，有时我mā有机会表达意见，才发觉家己ê台语讲bē liàn-tńg。虽然台语是母语，用tī日常生活，但是长期用北京话思考写文章，beh改变思考ê方式真困难。

95年多伦多台文班成立，朋友相招作伙读台文。Hit时阵台文是啥物，我并无真清楚，联谊ê心情大过读册。但是经过一段时间，我确实tī台文班内读着真chē 好文章，有ê真趣味，有ê hō͘人感动流目屎，我才渐渐了解台文ê重要性，分出台文kap中文ê无仝，有ê台语一定ài用台文表达才十分有意思，若换做中文就走精去。台文诗幼秀koh有感情，kap中文诗ê气势差别真chē。台语原本就是一个成熟ê语言，会tàng用做真阔ê文学创造。

就按呢，我经过台文班读kap写ê训练，台语ná讲ná顺。最近有时明明是讲北京话ê场合，台湾话mā无张无持讲出来，我才发觉tī不知不觉中，台语已经是我思考ê语言。

最近有人送我真chē有声ê册，就是演讲ê录音带。有一khûn是乡土文学作家陈映真先生ê｢台湾社会与文化」。原来我抱真大ê趣味beh来听这khûn录音带，无想着一开始就听伊讲「有一些台独派的朋友，主张讲台湾话，用台湾话来写文章、写诗，我不嘲笑这些人，只是语言要成为文学语言，需要百年，甚至二百年以上的时间。搞台语的人，对汉语不清楚，汉语一字一拼音字表示不清楚」。伊koh讲「国民政府为什么选用北京话做为国语？是为了我们民族的前途，因为北方语系有较多的文学作品。」真可惜！一位台湾籍ê乡土作家对咱家己ê语言无清楚，对家己ê土地无认同，啥物是民族ê前途？家己是啥物人，家己知。若是一般百姓无清楚，就无要紧，上害是有名ê作家有这款错误ê观念，koh 制造录音带，四界流传。

几冬前，另外一位台籍ê作家，陈若曦女士来多伦多演讲，tī伊ê简介内底提起「对目前大势所趋的本土化运动，独独对台语写作不以为然，主张用『台湾国语』才是康庄大道」。我会tàng了解长期用中文写文章ê人对台文ê困难，我知影台文对中文作家bē tàng期待，因为in拢khiā tī门脚口。只是我mā相信，台湾beh成做一个有信心ê国家，语言是伊ê第一步。

我有一位读物理ê朋友，用伊ê观点讲「语言是感情ê载波（carrier），kan-na母语会得kap灵魂，产生natural frequency ê共振。所以心理治疗需要用母语，紧急中所使用ê语言也是母语」。 母语是咱本来有ê物件，我相信真chē人kap我相仝，kā伊放sak去。今á日，因为我有机会学台语文，才kā伊khioh转来，恁若iáu khiā tī门口，欢迎恁行入来，tī台文ê世界，恁会chhōe着另外一片新ê天地。