《台文通讯精选》

 | | | 转寄

牵手莲治

作者 黄昭堂 2009.04.05

黄谢莲治女士tī主后1934年5月15日出世tī台南市。老pē谢雍先生，老母谢蔡叶女士，有二男三女，莲治是次女，排第二。

莲治tī日本时代出世，读台南市『花园小学校』。因为双亲拢受高等教育，所以，自细汉日本话tō讲了真好。初中kap高中拢读台南女中，1953年考入去台湾大学文学院英文学系。大学二年ê时，kap一阵同学去peh七星山，tī山顶遇着读台湾大学经济系三年级ê昭堂。因为山路有雪真ku̍t,查某学生拢有查甫学生牵扶，昭堂看着最后一位女生无人牵，tō伸手帮忙，一路做伙落山，两人自然开始交往。原来昭堂teh读『台南一中』ê时，寄宿tī前辈为着台南县北门郡出身ê中学生设立ê学生宿舍『北门寮』。『北门寮』tī民族路，隔一条小沟ê正对面tō是莲治ê厝。透过窗á应该看会着伊ê身影，总--是拢无机会熟似。

昭堂台大毕业了后，入第五期预备军官训练班，tī『车陇埔』、高雄『仁武营』训练期间，这位拢无反攻大陆思想ê女生，不时参加台大ê劳军团，去慰劳昭堂。二人约束将来beh做伙去日本留学。

1958年3--月，昭堂退伍了后，随订婚，仝冬6月14日tī台南县七股乡下山á寮，昭堂祖厝举行婚礼，证婚人是昭堂大学生时代bat kā助选、当选省议员ê无党无派政治家、合作金库ê经理郭秋煌先生夫妇。Tī国民党白色恐怖ê时代，无论任何理由拢无允准翁á某同时出国，其中一个一定ài留tiàm台湾。因为按呢，伊无入籍黄--家，1958年12月22日，二人拢是单身ê身份留学日本。

1959年2--月，昭堂考入去东京大学国际关系硕士课程，4月初4长男正澄出世，莲治才入籍黄--家。Tī gín-á khah大汉了后，莲治有心beh koh进修，申请进入东京大学文学部英文学系做研究生。M̄-koh tī 1961年4--月次男正宪生了后，tō办理退学。到1965年8--月三男正嘉出世，tō变做一位真正ê职业主妇。

莲治性情温顺静淑，做代志顶真，慢慢á来，一生m̄ bat kap人冤家。伊有台湾人意识，却无政治细胞。虽然有时会chhōa gín-á去《台湾青年》杂志社帮忙杂志ê分送，koh会chhōa gín-á去参加反对国民党政权ê街头示威游行，m̄-koh che是因为『嫁狗随狗，嫁猴随猴』ê古早美德，并m̄是有满pak 独立建国ê热情。

1960年2月28日，《台湾青年》社成立，昭堂是原始发起人之一，两年后hō͘国民党驻日大使馆吊销护照，莲治kap两个查甫gín-á ê护照mā仝时吊销，全家有三十四年久是『暴力份子、恐怖份子、叛乱黑名单人士』。甚至三男正嘉连台湾ê户籍mā无。莲治tī台湾生长ê时代，厝--里拢有人tàu做家事。来日本了后，一切拢ài靠家己，kā gín-á洗尿chū对伊来讲是真辛苦ê代志，昭堂提案卖掉结婚手指，买洗衫机，约束以后会买koh khah大脚--ê hō͘--伊。昭堂最后违约，实在是一生ê遗憾。莲治，gomennasai(对不住）！

1992年12--月，昭堂一家接着解除『暴力份子、恐怖份子叛乱罪』ê正式通知书，莲治kap昭堂离乡背井34年，第一摆koh踏tī台湾ê乡土。桃园机场有上千ê乡亲迎接，非常感动。第二日随转去山á寮祖厝，夫妻二人háu kah无声。昭堂父亲黄赐川先生真早tō往生，m̄-koh上爱ê阿妈黄许羌女士、母亲黄林怨女士、莲治ê双亲拢tī『暴力份子、恐怖份子ê叛乱罪名』时代过身，无法度转来参加葬式，实在真伤心。

昭堂1992年会tàng转来台湾，m̄-koh tī日本『昭和大学』政治学教授ê任期到1998年才满，为着避免无生活费，授课期间二人差不多两礼拜tō飞一摆，来往tī台湾、日本中间六年久，1998年就任名誉教授了后，chiah tī台湾安定--落-来。Hit年莲治诊断有『肺管扩张症』，医生讲che是久长ê病痛。嗽ài真出力，因为按呢肺部、心脏真衰弱。2003年12--月入院一个月，以后koh转来厝--里疗养半年。

昭堂看--起-来真顾家、疼某，mā有独裁独断ê一面，所以做伊ê某真辛苦。莲治有时会轻声讲起怨叹ê话，m̄-koh随koh用温柔ê声音消灭昭堂可能发生ê受气。莲治真可爱，kawaii(卡哇伊）！

因为昭堂tī外口活动ê时间长，伊家己一个人食饭无滋无味，身体愈来愈sán,后--来变作koh sán koh虚弱。因为按呢，昭堂面皮厚厚，遇着大小宴会kap聚餐拢无经过主人同意，tō chh伊ōa参加，希望伊加减会tàng食--一-点-a。今年8月15到19长男正澄chhōa全家转来台湾，18日eng 暗，伊竟然会tàng食一大碗ê鱼翅，che也是伊最后ê大餐。以后tō感冒，物件拢食bē落去。28日阮请日本朋友，转来厝ê时，伊tī大楼前跋倒，好佳哉骨无断--去，m̄–kú koh khah无办法食物件。9月初2下晡，昭堂亲身饲伊一碗杏仁茶，伊竟然真有力几嘴tō lim了，hō͘昭堂无感觉有啥物m̄-tio̍h｡9月初3早起7点半伊tī眠床顶讲「想beh lim水。」昭堂tī客厅无chhap--伊，kā讲「无beh起来食饭，会死。」8点20分昭堂做一碗杏仁茶，行入去伊ê房间，发现伊ê嘴唇变紫色，心脏、呼吸拢已经停止。救护车三分钟内到，随送去石牌荣民总医院急救。停止一点钟久ê心跳kap呼吸拢koh回复，m̄-koh意识无转--来。三个gín-á tī 9月初3半暝tùi日本赶转来看in亲爱ê母亲。进前，下晡6点25分林宗正牧师为伊洗礼。许承道牧师，义光教会ê几位会友来为伊祈祷。9月初6，陈宇全牧师祈祷了后，tī亲人ê陪伴，6点11分蒙主恩召。

莲治arigatou(多谢）！gokurousama(辛苦--ah）！

(原文是中文，张秀满翻译做台文。)