《台文通讯精选》

 | | | 转寄

学写台语文tùi｢Hō͘故乡ê恋人」开始

作者 林俊育 2008.10.19

这首诗是好友徐永光ê作品，三十外年前犹是青春男人ê我十分kah意。最近tī李勤岸教授ê指导下学会晓台语文，就试用全罗kap汉罗kā伊原着ê华文来翻译，hō͘我感觉koh-khah有滋味，想beh hō͘读者tam kóa母语ê滋味，看伊有外súi｡

原着华文版：给故乡的恋人

过去的相聚何其短暂
来日的相逢何其久远

悠悠岁月冲不断我的怀念
千山万水隔不断我的相思

请明月带给你我的情意
托秋风带给你我的祝福

全罗台语版：Hō͘ kò͘-hiong ê loân-jîn

Kè-khì ê tàu-tīn hiah-ni̍h-á té
Koh-lâi ê saⁿ-kìⁿ hiah-ni̍h-á kú

Iu-iu sòe-goa̍t chhiong bē tn̄g góa ê hoâi-liām
Chhian-san bān-súi keh bē tn̄g góa ê siong-su

Chhiáⁿ bêng-goa̍t tòa hō͘ lí góa ê chêng-ì
Thok chhiu-hong tòa hō͘ lí góa ê chiok-hok

汉罗台语版：Hō͘故乡ê恋人

过去ê斗阵hiah-ni̍h-á短
Koh来ê相见hiah-ni̍h-á久

悠悠岁月冲bē断我ê怀念
千山万水隔bē断我ê相思

请明月带hō͘你我ê情意
托秋风带hō͘你我ê祝福

以前一直因为无机会学习台语文，对台语文ê文学作品拒之千里之外。最近李勤岸教授应聘来哈佛大学教台语，阮教会特意安排伊来教同乡台语文，hō͘年龄已经过半百ê我才有机会学习kap法语仝款SEXY ê母语。才感觉着咱ê母语hiah-ni̍h-á可爱，hiah-ni̍h-á秀（细腻），hiah-ni̍h-á亲切。

李教授目前真拍拼teh提倡台语文学，各地同乡kap大学相争邀请伊去演讲。对伊ùi华语写作转变改用台语写作ê心路历程，我非常认同伊ê讲法kap作法。台湾人一直受外来政权统治，拢使用殖民语言写作，he是殖民文学，m̄是正港ê台湾文学。伊举英国、俄罗斯之脱离法语ê殖民文学kap美国文学tùi英国文学独立--出-来ê例，来强调台湾文学ê重要性。伊犹koh强调讲，只有台语文学才会tàng tùi中国文学独立--出-来，che需要koh khah-chē ê有识之士来共同努力奋斗。李教授无避辛劳来为台语文学播种，希望会tàng早日开花结果。

李教授是一个台湾（台语文）文学ê实践者，伊讲台湾大作家李乔mā认为台湾文学应该用台语文写作，才会tàng写出诺贝尔文学奖ê水准作品。目前台语文作品tú--着最大ê困难是读者市场。但伊强调讲，伟大ê文学家ài有使命感来开创家己ê新天地。伊「不问收获，只问耕耘」ê精神hō͘我真感动，希望tī我有生之年会tàng为台语文学拍拼。

目前台湾教会公报（创刊时全版使用罗马字台语）kap台湾公论报已经开辟台语文版面，台湾公论报koh有客语版面。最近创刊ê｢台湾e文艺」 kap「海翁台语文学」拢是台语文ê作品，in ê外观品质无输华语杂志，内容mā日日提升。希望今后有koh khah chē ê报章杂志会tàng开辟koh khah chē ê台语文版面。有人讲台语文学tī台湾普及了后，统派ê平面媒体就会死路一条，只好转去in ê中国才会tàng生存。按呢讲--来，台语文学是值得咱来拍拼--ê｡

一般台湾读者对台语文字有生疏感，好佳哉有使命感ê苏芝萌教授带头一群义工为台语文字（Holo kap Hakka)电脑化无出声拍拼，目前已经克服大部分ê困难点。我顶面ê全罗kap汉罗就是使用T/Windows写--ê,非常好用。In无计较代价ê努力是推展台语文学ê最大功臣。另外，郑良光等一阵人koh发行「台文通讯」来做推展ê工作。

希望大家多多来参与，共同创造独立ê台语文学，che是值得咱台湾人骄傲ê一件大代志。