《台文通讯精选》

 | | | 转寄

人无照天理，天无照甲子（chí)

作者 许文政 2008.04.27

近几年来常常有teh听讲全球气温升koân ê问题。因为人类使用能源以后所累积ê废气引起温室效应，致使地球上气温不断有升koân ê趋势。气温不断升koân会产生反常气候现象。这款现象比如几年前加拿大Ontario省kap Quebec省落冰雨成灾，电力系统受着真大ê破坏，tī寒冷ê冬天停电规月日，受着chē chē ê不方便kap损失，这款灾害tī加拿大是过去所m̄ bat tú着ê。最近台湾做桃芝风台落大雨，水流kah崩山，半暝á大水kā民家流kah无看影，造成人间大悲剧。学者研究ê结果，认为气温升koân，khah会做风台，雨量mā会khah大。

这摆风台tī台湾造成严重灾害ê主要原因，是大自然生态水土环境，受着破坏所致。经济高度发展，大家固然会thàn钱，财富增加，人人好额。总是有一个好tō无二个好，若为着beh thàn khah chē钱，beh koh khah好额，tio̍h需要用koh khah chē资源、能源。无规划节制，kan-taⁿ乱ku̍t、乱phut，深山林内也beh造公路开发，水土生态kap自然环境受破坏。人若无照天理，天tō无照甲子。天若无照甲子，气象反常，人着会受天灾地变ê严重灾害。

无外久以前，tī台湾有一个86岁ê老人批评新政府讲chit-má生理真pháiⁿ做，因为chit-má ê政府不如40年前ê政府。40年前ê政府是中国国民党一党专政，戒严专制，独裁恐怖统治台湾ê时期。当时劳工受严重压制，环保无受重视，黑金勾结，生理人若送红包，啥物非法ê代志mā会tàng做，汞污泥废料会tàng随便倒，随时污染自然环境。国民党mā利用各种党营事业，利用特权kap民争利，tī台湾累积数千亿以上ê党产。全世界无任何一个政党亲像国民党hiah-nih有钱、好额。86岁á ê这个老人目睭pe̍h金所看ê是「钱」，头壳所想ê是「钱」，心内只有是「贪」。为着自己ê利益讲出无是非无天理ê话，时时刻刻tō是想beh koh khah好额，koh khah有钱。山崩水流，家破人亡是别人ê代志。人按呢无照天理，天tō无beh照甲子。钱淹脚目是真好，水若淹厝顶tio̍h凄惨chē kòa叫苦连天。

人ê生活中需要各种物质来满足chē chē ê欲望，但无必要过着奢华thó-chè ê生活。人mā tio̍h心灵丰盛，来怜悯疼惜自然万物，飞禽走兽，树木花草，会晓欣赏感触四季ê变化，大自然ê秩序kap规律。时时tī感谢o-ló中感受知足ê喜乐kap心灵ê平安。